Start arbeidet med helsehus no!

Kommunestyret diskuterte nyleg planane for eit nytt helsehus på Husnes, og skal vi tru avisreferata etter møtet er det stor interesse for eit slikt prosjekt både i administrasjonen og i det politiske miljøet. Mange vil endåtil hevda at det er på høg tid at det blir teke initiativ til eit nybygg for helsetenestene. Det nye huset vil blant anna føra til meir effektiv drift og samla sett redusera driftskostnadene, vart det sagt i kommunestyret. Der vart det også opplyst at noverande avtale med Helse Fonna om Husnes helsesenter går ut i 2026.

Men innstillinga frå kommunedirektøren om å innarbeida prosjektet i økonomiplanen for åra 2023–2026 møtte motbør, blant anna frå Høgre. Rett nok tykte partiet sin talsmann at planane om eit helsehus er ein god idé, men var likevel i tvil om det let seg gjera å finansiera prosjektet i økonomiplanen fram til 2026. «Vi må ikkje skapa for store forventningar», sa han blant anna.

Det står respekt av politikarar som er økonomisk bevisste og ikkje lovar meir enn det som er mogleg å få til. Så langt støttar eg høgrerepresentanten sin skepsis.

Dette betyr likevel ikkje at det alt no må vera lov å starta arbeidet med prosjektering og planlegging av eit tenleg helsehus for ytre delar av kommunen – og vonleg få på plass finansieringa når den tid kjem. Politikarar flest finn alltid pengar til ulike prosjekt viss ein berre vil og ønskjer det nok!

Eit helsehus i sentrum på Husnes, eit steinkast frå butikkar, øvrige servicetilbod og snart det nye seniorsenteret, vil truleg vera eit kjærkome tilbod for folk i kommunen. Dersom Høgre også stiller seg tydeleg bak det nye initiativet, vil dei samtidig kunna visa seg fram som eit parti med ekte engasjement for utvikling og vekst i regionsenteret Husnes. Så langt har partiet i fleire andre saker siste åra vore litt for tilbakehaldne, tykkjer eg.

Kristian Hus