Ei veke til sjøs for Maia

I over éi veke var Maia Fredheim mannskap på «Statsraad Lehmkuhl», som ein del av Tall Ships Races.

Fredag kveld svinga staselege «Statsraad Lehmkuhl» inn på Skålavikjo og la seg til der for natta. Som den einaste av medsiglarane om bord, vart Maia løyvd tre timar landlov i heimebygda.

– Me byrja å segla frå Fredrikstad 14. juli. Eg mønstra på dagen før, var klar då. Og det har vore veldig kjekt. Me var i Skagerak, med bølgjer frå Nordsjøen rullande på oss. Det var ei utfordring. Då segla me, med segl i alle mastene, fortel Maia til Grenda.

Laurdag morgon gjekk turen til Leirvik, for seglasen enda i Bergen, der det er skutefestival fleire dagar til ende.

Hardt arbeid

Maia Fredheim er ein av fire Kvinnherad-ungdommarsom har fått vera med på årets Tall Ships Race. Med seg på «Statsraad Lehmkuhl» har ho hatt Eirik Johannessen Ulvenes, medan Aleksander Olderkjær Kolaas og Thea Cecilia Hoem har vore medseglarar på «Sørlandet».

– Det har vore ei oppleving. Eg vil verkeleg tilrå alle som får sjansen til å vera med på noko sånt, om å bli med. Men det har vore strevsame dagar, og med vakter til alle tider, så har det blitt slik at dagane har gått litt over i kvarandre. Og det er tungt arbeid me gjer, mellom anna med alle taua som skal halast og dragast i, meiner Maia.

Frå ho mønstra på til ho mønstrar av, er det berre nokre få timar denne veka ho har hatt fast jord under beina. Det er retteleg sjømannsliv ho har vore med på, og Maia har på ingen måte vore passasjer.

– Eg har hatt ulike vakter. Nattevakt, mellom anna, der eg må vera vaken mellom 12 og fire på natta. Eg har hatt bøyevakt, der me står ein time og følgjer med på om nokon har ramla over bord, utkikksvakt, der må står i baugen og ser at det er fritt leide føre oss, og rorvakt, der me har styrt båten, forklarer 16-åringen.

Sovinga har blitt gjort i hengjekøye, noko som ho syns har vore supert, trass i at det har vore trongt.

– Eg har vore om bord med mange kjekke folk. Det har verkeleg gitt meirsmak, smiler Maia på veg inn til timane med landlov.