Tre nye artistar til Festidalen

Med Sondre Justad, Store P og gruppa Hjerteslag er no festidalprogrammet komplett, og i alt vil det vera 13 artistar i sving 4. og 5. august under den populære festivalen.

Sondre Justad, den unge mannen frå Henningsvær i Lofoten, debuterte med plata «Riv i hjertet» og vart fort ein av landets mest spelte artistar. Ein popularitet som har resultert i innslag på mellom anna Senkveld, Lindmo og VG-lista Topp 20.

— Sondre Justad er for tida ein av Noregs største artistar, og det hans tiltrekkande popunivers som er grunnen. Hudlause tekstar, nerve, og musikalsk timing få matchar han på, er merkelappen Bookingansvarleg, Daidalos Dahle, gir den unge musikanten i ei pressemelding.

Store P

Rapparen Store P frå Fyllingsdalen slo gjennom med albumet «Regnmannen» i 2014, noko som resulterte i ein Spellemannpris. I år har han slept i alt tre singlar, den siste «Husk å puste» vart slept i dag.

— Store P står for ein sjukt sjølvstendig stil. Rapparen har ein ro og eleganse som gir låtane ein subtil form for intensitet. Dei treff deg mjukt, men sug seg fast. Imponerande fyr, er karakteristikken rapparen får frå Dahle.

Hjerteslag

Siste og endelege tilskot til festidalprogrammet er bandet Hjerteslag. Eit band som lenar seg på britisk indie og amerikansk rock. Bandet vart hylla for albumet «Vannmann86». Festidalen trur dette vert eit av årets absolutte høgdepunkt.

— Hjerteslag har vore eit mål for Festidalen sidan debuten. Mange kjenner dei jo no, men for dei som ikkje gjer det vert dette ein smaksrik sak. Hjerteslag er lyden av i dag, rundar Dahle av i pressemeldinga.

 

Med dei tre tilskota vert då endeleg program for Festidalen 2017 som følgjer: Onkl P & De Fjerne Slektningene, Spidergawd, Store P, Ary, Hjerteslag, Daniel Kvammen, Elsa & Emilie, Odd Nordstoga, Sassy Kraimspri, Bottlecap(S), Sondre Justad, Julie Bergan og Danko Jones(CAN).