– Vesentleg for politikarane å ta stilling til

Advokat Alsaker hevdar opparbeidinga av Børneset er ei ordinær byggesak som kommunen må ta stilling til straks. Kommunedirektøren meiner i staden at det er ei sak som politikarane må handsama. Komande onsdag står Børneset på menyen til forvaltningsutvalet.

Ein søknad frå Eidsvik & Selstad Eigedom AS om opparbeiding av Børnes industriområde ved Uskedalen kjem opp i forvaltningsutvalet neste veke. Kommunedirektøren innstiller på å gje løyve til tomteplanering fase 2 av inntil 30.817 m3 fjellmasse. Men det vert stilt nokre vilkår, mellom anna at det i perioden med knusing av stein skal takast særleg omsyn til nærliggjande bedrifter, slik at det fører til minst mogleg ulempe i høve til støy og støv. Det må også lagast ein framdriftsplan som viser at sprenging og knusing skal skje innanfor eit nærare avgrensa tidsrom.

I fase 1 vart det gjeve løyve til uttak av 9.500 m3 steinmasse, slik at totalmengde er på 40.317 m3.

Samanlikna med Årsnes

Siste dagen i januar sendte advokat Alsaker brev til kommunen. Han hevdar dette dreiar seg om ei ordinær, rutinemessig byggesak som kommunen må behandla straks:

«Hvorfor det skulle være behov for politisk behandling av en byggesøknad som er i samsvar med både gjeldende reguleringsplan og kommuneplan fremstår ikke åpenbart. Så lenge et tiltak er planavklart skulle en tro at tiltaket hadde tilstrekkelig forankring i politisk og demokratisk fattede vedtak. Om en i tillegg sammenligner med tilsvarende saksbehandling av lignende tomtebearbeiding og sprenging på kommunalt eide tomter, må en kunne stille spørsmål ved om kommunens administrasjon praktiserer likebehandling. Det vises her blant annet til saksbehandlingen av utsprenging av 40.000 m3 fjell på kommunalt eid tomt på Årsnes», skriv han.

Nabomerknader

I saksdokumenta svarar administrasjonen at dei har vurdert at denne saka må behandlast politisk av fleire grunnar.

«Saka er prinsipiell fordi det vert søkt om eit vesentleg tiltak i eit område med reguleringsplan frå 1978 som seier lite om rammene for tiltak. Når det no pågår nytt reguleringsplanarbeid, så er det naturleg at slike store sakar vert handsama politisk, slik at det på eit overordna nivå kan takast stilling til utviklinga. Det er òg nabomerknader i saka, som sist førte til klagesak og nytt vedtak», heiter det.

Dermed konkluderer administrasjonen at dei hadde gått utover sitt mynde om denne saka vart handsama delegert. Dei svarar òg på samanlikninga med Årsnes.

«I reguleringsplanen på Årsnes er det vist til mellombels massedeponi på staden. Området er under etablering og det har vore merknader som vart svart ut i behandling av saka. Det vesentlege som skil saka på Årsnes frå saka som no skal behandlast, er at det på Børnes er merknader frå andre næringsverksemder i planområdet. Dette er vesentleg for politikarane å ta stilling til».