Har starta opprustinga av nettet
Denne veka starta Kvinnherad breiband ei omfattande oppgradering av sitt noverande nettverk- og driftssystem. Og snart kan dei tilby alle sine kundar 1.000 megabyte i bandbreidde.
– Vi går no i gang med å skifta all nodeteknologi i våre 39 nodar over heile kommunen. Vi starta tysdag med å kopla over dei fyrste ti kundane på Korsnes i Uskedalen, og vil i løpet av den komande veka ha flytta over alle dei 115 kundane som er knytt til den noden, seier teknisk leiar Svein Nipen i Kvinnherad breiband.
Artikkelen held fram under annonsen.
Vel eitt år
Dei vil så fortsetja med å kontinuerleg skifta ut all gamal teknologi, og reknar med at dei innan vel eitt år vil kunna tilby alle sine kundar 1.000 megabyte i bandbreidde.
– Sagt veldig enkelt så flyttar vi kablane over frå dei gamle switchane og over på dei nye som taklar 1.000 Megabyte, eller 1 gigabyte som det heiter. Det kjem til å bli ei heilt anna verd, og vi reknar med at når vi er ferdig og har kopla om for alle våre 4.000 kundar, så er vi ein av dei fyrste breibandsleverandørane som kan levera 1 gigabyte til alle våre kundar, seier Nipen.
TV og streaming
Steget inn i den nye teknologiverda gjer dei saman med deira nye teknologi- og kompetansepartnar, NetNordic. Eit steg Nipen ser på som heilt nødvendig.
– Denne utskiftinga er eit ledd i framtidas behov for auka bandbreidde. Då særskild knytt til TV og ikkje minst streaming, seier Nipen.
Og i den forbindelse kan den tekniske leiaren hjå breibandsleverandøren i Dimmelsvik røpa at også TV-delen vil få eit løft.
Artikkelen held fram under annonsen.
– I forbindelse med dette skal vi også gjera endringar i TV-tenestene våre. Det vil bli meir fokus på streaming, vi vil tilby skylagring, det blir vekearkiv av program og vi vil tilby TV gjennom Apple TV, seier Nipen.
Kunde nr. 4.000
Dei har så langt fått 150 nye kundar i 2017, og reknar med at talet vil stiga til bortimot 300 før nyttår. Faktisk fekk dei nyleg sin kunde nummer 4.000, og utan å røpa for mykje om kven det er eller kva som skal skje. Kan Nipen fortelja at det sjølvsagt vil bli markert.
– Det har vore stor pågang av nye kundar, og vi har runda kunde nummer 4.000, noko som skal bli feira etter ferien. I tillegg så håper og trur vi at dette teknologiskiftet vil bidra til enno større etterspurnad, sluttar han.