Tilbyr deg brunfarge heile året

Yasmin Bjelland har hatt travle dagar etter at ho starta opp sitt mobile spraytan-firma i slutten av juni.

– Det har vore overveldande. Eg lagde ei Facebook-side og vakna opp til over 150 likar-klikk neste dag. Sidan då har bestillingane har tikka inn, så eg ser at det absolutt er stor interesse for spraytan her i kommunen, seier Yasmin Bjelland.

 

Testar det sjølv

Ho har sjølv vore på andre sida av «disken», og var då ho budde i England fast kunde av det produktet ho no sel.

– Eg sakna tilbodet her i Kvinnherad, og sakna den rette fargen. Før no har dette produktet berre vore i England, men då dei no bestemte seg for å gå internasjonalt, så heiv eg meg på, seier Yasmin.

I tillegg til å gjennomføra nettbaserte kurs, reiste ho òg til London for å fullføra den praktiske delen av kurset. Med seg heim til Kvinnherad har bøttevis av kunnskap til spraytan, og det ho sjølv meiner er det produktet som gir mest naturleg brunfarge.

– Eg har sjølv vore kunde og har testa mykje forskjelleg. Og det er heilt klart denne typen eg sjølv har vore mest nøgd med, seier Bjelland.

 

Nøgde kundar

Sommarfargen kan du få kor som helst. Med sitt mobile spraytantelt kan ho flytta kontoret ut, inn i si eiga stove eller heim til kunden. Og for å få ein brunfarge som varer opp mot sju dagar, tek det berre tre kvarter.

– Då går eg òg gjennom viktige tips og triks for at brunfargen skal setja seg best mogleg, seier ho.

Og bra har det verkeleg blitt, fortel Yasmin.

– Så langt har alle kundane utanom ein vore nøgd. Men i det eine tilfellet handla det om at personen ikkje hadde følgt alle råda på vegen, slik at fargen ikkje sat seg så godt som den skulle, seier ho.

Og om du trur at dette er eit tilbod berre damer nyttar seg av, då tek du feil.

– Nei, langt i frå. Eg har hatt fleire mannlege kundar. Så dette er noko for alle. Ser du til England så har det vore vanleg med det vi kallar mantan i lengre tid, seier ho.