«Under himmel over hav»
Laurdag 17. juni arrangerer Interesselaget Vangssago sitt tradisjonsrike juni-arrangement. I år er det dyktige lokale artistar som skal stå for musikken.
Årets arrangement, som har fått namnet «Under himmel over hav», vil by på ei rekkje lokale innslag og variert musikk. Trioen Hør med Hilde Svabjørg på vokal, Runa Isene på fiolin og Øyvind Sture på gitar vil framføra melankolske viser.
– Det er Øyvind Sture som står for både melodi og tekst på dei visene vi kjem til å framføra, opplyser Runa Isene.
Artikkelen held fram under annonsen.
Det 11. i rekkja
Rosendal songlag med dirigent Eva Megyesi vil gi deg innslag frå musikalar til norsk folkemusikk. Til sist vil Duo Romantica med nemnte Isene på fiolin og Eva Megyesi på piano, framføra klassisk musikk med mellom anna Schumann og Beethoven.
– Det er eit arrangement vi prøvar å få til kvart år, og i år er det det 11. i rekkja etter oppstarten. Tidlegare har vi henta inn gjestar frå andre stadar, men i år satsar vi meir lokalt. Det vert eit program med variert musikk, fortel Karin Thauland, styremedlem i Interesselaget.
Arrangementet vil verta arrangert på sago.
– Vi vonar på godt vêr. Ta med sitjepute og ta turen, oppmodar Thauland sluttvis.