Framifrå, intens opningskonsert

Gårsdagens opningskonsert av årets Kammermusikkfestival var ei storslagen oppleving for ein stappfull Riddersal.

 

Konserten opna med «Prelude og Scherzo for strykeoktett» av Sjostakovitsj, som verkeleg sette stemninga.

– Eg har gleda meg stort til årets festival. Allereie som student i Bergen forstod eg at Sjostakovitsj sin musikk ville bety noko for meg resten av livet, fortalte Leif Ove Andsnes før han ga ordet til fylkesordførar Anne Gine Hestetun:

– Det at vår eigen fantastiske Leif Ove vel å bruka så mykje tid og energi på å arrangera kammermusikkfestival må vi berre takka for. Vi er utruleg stolte over deg, smilte Hestetun.

 

Komponisten sjølv

Anthony McGill imponerte med si framføring av sonate for solo klarinett av Denisov, og sette instrumentet meir tydeleg på kartet. Andsnes entra deretter scena saman med baryton Andrei Bondarenko for å framføra «Sanger og danser om døden». Ei intens og kjensleladd oppleving.

Etter vel tjue minuttars pause fekk Ensemble Allegria, saman med dirigent Christian Eggen og tenor Christophe Poncet de Solages, æra av å framføra Zaitevs brev for komponisten sjølv, Alexander Vustin, som vart henta opp på scena etter ei flott, kort og dramatisk framføring.

Kveldens høgdepunkt var kammersymfoni av Sjostakovitsj, framført av Ensemble Allegria. Eit imponerande dynamisk avslutningsnummer.