Vidar Mehl til Swix Hard Rocx

Etter å ha sykla for Sepura Toyota dei seks siste åra, vert Vidar Mehl frå Omvikdalen no lagkamerat med sine tidlegare rivalar i hardtsatsande Team Swix Hard Rocx.

– Dette er eit skikkeleg satsingslag, så eg føler meg veldig heldig som no har fått moglegheita til å verta ein del av det sterkaste laget i Norge, seier den sykkelsterke 29-åringen.

Det har lenge vore klart at hans tidlegare lag, Sepura Toyota racing with Birk, kom til å leggja ned etter fjorårets sesong. Og sjølv om det var tilfeldig, var det heilt avgjerande for Vidar Mehl at han framleis fekk sjansen til å vera ein del av eit lag.

– Eg var lenge usikker på kva eg skulle gjera. Det å vera ein del av eit lag og ha eit proft opplegg rundt seg, er utruleg viktig for meg. Så det var på mange måtar vinn eller forsvinn, hadde eg ikkje fått denne sjansen, så hadde det vore vanskeleg å finna den naudsynte motivasjonen for å fortsetja, seier han.

Men med nytt lag kom òg ny motivasjon. Og den allsidige syklisten kan no knapt venta til sesongen trør i gang att i april.

– Eg gler meg veldig. Det er nytt lag, nye lagkameratar og nye folk. Så for meg betyr det på mange måtar ein ny start med blanke ark og bøttevis av nye impulsar. Vi har allereie i full trening, og køyrer hardt for å byggja opp grunnformen, seier han.

Og målsetningane for sesongen er klare. Gjera det best mogleg i Norgescupen og vera med å kjempa i dei store ritta.

– Grenserittet og Sykkelvasaen er allereie merka med raudt i kalenderen, så dei ser eg spesielt fram til. Elles ynskjer eg å hevda meg godt i Norgescupen, avsluttar Mehl.

Swix kjøpte før 2016-sesongen opp den norske sykkelprodusenten Hard Rocx. Det som ein del av Swix si satsing på å verta ei heilårsmerkevare.