Fekk bot og bruksforbod for å ha skiltet i frontruta og sota sideruter

Ein førar av ein personbil må ut med 3.000 kroner for å ha hatt kjennemerket i frontruta. Same personen fekk også bruksforbod for å ha sota siderutene.

Statens vegvesen kontrollerte 18 køyretøy då dei hadde trafikkontroll på Husnes onsdag. Elleve tunge og sju lette køyretøy var innom kontrollplassen, blant dei ein sjåfør som fekk bruksforbod og bot.

– Ein førar av ein personbil fekk 3.000 kroner i gebyr då kjennemerket låg i frontruta. Denne føraren fekk også bruksforbod for å ha solfilm på siderutene framme, og ein kontrollsetel for feil på lys, skriv vegvesenet.

I tillegg til det var ein førar meldt til politiet for brot på køyre- og kviletidsreglane. Den same føraren fekk også 1200 kroner i gebyr for manglande kjetting og manglande rapport om utgått to-årskontroll på krane.

– To firma vil bli innrapportert til føretakskontroll for brot på køyre- og kviletidsreglane. Og to andre førarar fekk kontrollsetel for feil på lys, skriv vegvesenet.

Dei observerte også eit passerande køyretøy med svarte oblatar på kjennemerket.

– Dette er forbode og vil medføra ei bot på 3000 kroner i gebyr om dei vert stoppa i kontroll. Dette må vel vera unødvendig bruk av pengar, spør kontrollørane seg og held fram:

– Elles vil vi minna om viktigheita av å kontrollera alle lys på køyretøyet og alltid bruka bilbelte. Hugs også refleks no i mørketida.