Opnar snart for vårens søknadsrunde

SpareBank 1-Stiftinga Kvinnherad er nettopp ferdig med å presentere gåvemottakarane frå hausttildelinga. Likevel er dei straks klare for å setja i gong med vårrunden.

Har organisasjonen din eit prosjekt som treng midlar til gjennomføring, ynskjer stiftinga no å informera at søknadsportalen opnar 8. februar. Til dei som vil freiste lukka, har leiar Bente Lie Nilsen følgjande tips å koma med:

– Bruk god tid på søknaden, lag eit budsjett og hent inn prisar på prosjektet.

Søknadsportalen stenger tysdag, 8. mars, og ein har såleis nokre gode veker på seg til å gjere dette. Føremålet til stiftinga er å gje bidrag til ålmennyttige føremål. «Vi skal løfte frivillig engasjement og innsats», står det å lesa på sidene deira.

I sist runde delte SpareBank 1-stiftinga Kvinnherad ut totalt 8.348.000 kroner fordelt på 71 ulike prosjekt. I vårutdelinga i 2021 vart 10.342.500 kroner tildelt og reservert på 85 ulike prosjekt.