Psykisk helse og FNs berekraftmål på agendaen

Neste veke er det klart for dei årvisse Samtidsdagane ved Høgskulen på Vestlandet, campus Stord.

For fjortande år på rad inviterer Høgskulen på Vestlandet til Samtidsdagane, 25. og 26. januar. Tema i år er psykisk helse og FNs berekraftmål. Grunna smittesituasjonen vert det heile gjennomført som eit digitalt arrangement, og programmet vert difor strøyma.

Kjersti Toppe, Barne- og familieminister, skal opne Samtidsdagane saman med Gunnar Yttri, som er rektor ved Høgskulen på Vestlandet og ordførar i Stord kommune, Gaute S. Epland.

– Vedkjem oss alle

– Vi skal innom emosjonelle og sensitive tema i skule, barnehage og helsevesen. Det er vonde tema, som ein av den grunn ofte vegrar seg for å forhalde seg til. Paradoksalt nok ser vi - dessverre – at mange av dei blir stadig meir aktuelle å lære om, og kunne snakke om, fortel Alf H. Aronsen i ei pressemelding.

I programmet peikar Epland på kor relevant og interessant tematikken for årets hending er. Yttri uttalar seg i liknande ordlag, og meiner at årets tema vedkjem oss alle.

– Dei ulike programpostane fortel at ein har syn for ikkje berre det lokale og nasjonale, men også det internasjonale. Eigne studentar og tilsette bidreg og deltek både i utforming og gjennomføring. Eit slik arbeid set spor og gjer ein viktig skilnad langt utover Sunnhordlandsregionen, skriv Yttri.

Programmet tek mellom anna opp tema som sjølvmord, korleis ein snakkar med barn om døden eller seksuelle grenser, barnefattigdom, flyktningekrise og nettovergrep.

Om overgrep

Anders Totland er blant dei som skal vera med på å setja desse temaa på dagsorden. Først ut i posten «Pappas hemmelighet», som ein samtale med utgangspunkt i boka med same namn, skrive av Vilde Bratland Hansen. Far hennar vart utsett for seksuelle overgrep som barn. Først 40 år etterpå klarte han å fortelja om det.

– I denne programposten vil først Bratland Hansen reflektere over kvifor overgrepsutsette menn er eit tema som framleis er forbunde med skam, og kvifor det tok så lang tid før faren hennar fortalde om sine problem. Ho vil òg samtale med Anders Totland om vi unngår å snakke om det som er vanskeleg, for å skåne våre næraste?

Totland skal også leia samtalen i den siste posten på programmet, «Det mørkaste rommet. Historien om Dark Room. Den mest omfattande jakta på nettovergriparar i Norge».

Samtalen vil skje mellom politibetjent Hilde Reikrås, gravejournalist Ingunn Røren og Monica Sydgård, som er leiar for Redd Barna sitt Norgesprogram. Her vil ein mellom anna få verdifulle råd og kunnskap for å kunne beskytte barn og unge som lever liva sine på nett.