Valsa over Fitjar etter pause

Ført fram av ein Erik Voster Solberg i storslag gjekk Trio frå fiasko til gull etter sidebyte då dei møtte Fitjar til midtvekekamp torsdag kveld.

Med ein tydeleg kampplan om å slå langt opp på trioen i front og pressa etter med midtbaneleddet, var det såleis uheldig at kvaliteten på pasningane mangla innleiingsvis. Enkle personlege feil og ein statisk midtbanetrio som heile vegen var tidelen for sein inn i duellane førte til at angrepsforsøk etter angrepsforsøk aldri vart meir enn berre eit halvhjarta forsøk.

 

Mot spelets gang

Likevel var det mot spelets gang då eit uhyre defensivt Fitjar, etter åtte minutt, gjekk opp i leiinga etter at Jonas Aleksandersen skrudde eit frispark over muren og forbi ein uheldig Eirik Eikeland som snubla i fråsparket.

Og om raudtrøyene til Aleksander Ekeland sleit med å trenga igjennom eit baktungt Fitjar-lag før scoringa, vart ting langt frå enklare etter. Grøntrøyene fall enno djupare i bana, og la alle egga sine i ei korg; å forsvara leiinga med nebb og klør.

Det fungerte vel og bra ut omgangen, men då ein innbiten Trio-gjeng kom ut etter sidebyte var det for å slå tilbake. Slurv og sløvheit vart erstatta med presisjon og iherdig innsats, og spelarane flytta plutseleg beina raskare. Og når i tillegg ungguten Erik Voster Solberg hadde bestemt seg for å levera karrierebeste i Trio-trøya, kunne det berre gå ein veg.

 

Festfotball

Fyrst utlikna Eivind Saghaug frå ellevemetersmerket like etter avspark, før same mann skaut raudtrøyene elegant opp i leiinga då andre omgang var elleve minuttar gamal. Like etter var heimelaget på hugge igjen. Eivind Saghaug bretta ballen ut på venstre flanke med ein eminent krossar i retning Erik Voster Solberg. Unge Solberg utnytta at han i snart 60 minutt hadde gjort Fitjar sin høgreback svimmel, og tok ballen med seg forbi på fyrste touch og serverte Allkan Abdulla si fyrste scoring for sesongen. Ei vakker scoring av heimelaget.

Og etter å ha brent eit par feite sjansar etter innhoppet sitt, fekk også Martin Veastad vera med på moroa då han fastsette sluttresultatet til 4-1 25 minutt før full tid, til Aleksander Ekeland si store begeistring.

– Dette var bra. Vi er sløve og gjer mange upressa feil i fyrste omgang, vi beveger oss lite og er seine opp i press etter at vi har tapt ballen. Men i pausen vert vi einige om å gjera ein betre jobb i den offensive markeringa, flytta beina raskare og venda spelet oftare. Det fungerer bra og vi er veldig gode i andre omgang. Særskild Erik leverer ein strålande andre omgang, seier Ekeland.