Stor kontrakt til Norsafe

Det er blitt ei stund sidan førre gong Norsafe kunne melda om ein ny livbåtkontrakt. Men torsdag ettermiddag kom endeleg gladmeldinga.

I dag kunne Norsafe offentleggjera at dei har teikna kontrakt med skipsverftselskapet VARD-Group, og skal levera livbåtar med davitar til ein serie på 15 nye MCV-farty (Module Carrying Vessel). Oppdragsgjevar for VARD-gruppa er Topaz Energy and Marine, som har hovudkvarteret sitt i Dubai.

Kvart av dei nye skipa vert 123 meter lange og 16,5 meter breie. Bygginga skal føregå ved verft i Vietnam og Romania. Norsafe skal levera to JYN 57 livbåtar med LHD-60 davitsystem til kvart skip, til saman 30 livbåtar og davitar.

Norsafe sine leveransar skal skje mellom januar 2017 og juni 2018. Om dette også fører til arbeid på Årsnes, er førebels ikkje kjent.