Går i gang med fleire operasjonar

Gjennom heile pandemien har planlagd behandling blitt utsett i Helse Fonna. Men no planlegg helseføretaket for fleire operasjonar igjen.

Frå og med neste veke aukar Helse Fonna aktiviteten igjen. Det har beredskapsleiinga i helseføretaket bestemt.

– Vi aukar opp forsiktig med operasjonar, slik at vi får behandla fleira pasientar som no sit og ventar på å koma inn for operasjon. Vi er framleis usikre på korleis dei neste vekene blir med tanke på korona, men akkurat no er det færre koronapasientar innlagd, spesielt på intensivavdelingane våre. Difor aukar vi opp no, men kan fort ta ned igjen drifta om det skulle vera behov for det, seier administrerande direktør Olav Klausen i ei pressemelding.

Klinikkoverlege Helge Espelid i kirurgisk klinikk støttar avgjersla.

– Det er fint at vi no kan koma i gang med meir kirurgi. Først opnar vi for dagkirurgi denne veka, og satsar på å få opp igjen operasjonsteam frå og med neste veke. Vi prioriterer å koma i gang med pasientar som ikkje er av det tyngste slaget, men vi er også innstilte på at vi raskt må snu oss om og redusera aktiviteten, om situasjonen elles tilseier det, seier Espelid.