Stort steg mot historisk avansement etter siger i Kroatia

Tina Abdulla scora tre mål då Borussia Dortmund tok ein knusande siger i Champions League søndag ettermiddag. No nærmar klubben seg eit historisk avansement.

Dei svart- og gulkledde jentene frå Dortmund har hatt for vane å skriva klubbhistorie på parketten dei siste åra. Søndag tok dei eit stort steg på vegen mot avansement i Champions League.

For etter at dei feia kroatiske Podravka Vegeta av banen i Kroatia, og kunne jubla for ein komfortabelt 32-24-siger, står Tina Abdulla og Dortmund no med ni poeng etter ni kampar i det innleiande gruppespelet i Champions League.

Med det ligg dei på ein 4. plass i gruppe A og er på full veg mot sluttspelet i den gjævaste klubbturneringa handballen har å by på. Dei har også moglegheit til å nå sluttspelet med den høgaste summen poeng eit tysk handballag nokosinne har fått i Champions League.

– Vi er veldig nøgde med å ha sikra poenga. Vi vil koma til sluttspelet, sa trenar André Fuhr til lokalavisa Ruhr Nachrichten etter kampen.

Tina Abdulla spelte ein god kamp for gjestane, og høgrekanten frå Husnes noterte seg for tre scoringar i 2. omgang.