Forrykande start på det nye året
Tina Abdulla noterte seg for seks nettkjenningar då Tertnes starta 2018 med å slå Glassverket 30-27 på bortebane onsdag.
– Det var eigentleg ein litt treig og rotete kamp innleiingsvis. Då særskild i forsvar. For sjølv om vi har lagt bak oss ei god treningsveke der forsvaret har vore bra, så fekk vi det ikkje ut i kamp, og slepp difor inn litt for mange enkle mål, seier Tina.
Men i angrep svinga det betre for blåtrøyene, som til slutt slo Glassverket med tre mål.
Artikkelen held fram under annonsen.
– Det er jo ein kamp alle forventar at vi skal gå sigrande ut av, men det var godt å koma i gang i 2018, seier Abdulla.
Sjølv stod hurtigtoget frå Husnes for seks av Tertnes sine scoringar. Og har med det fått ein god start på det nye året.
– Eg hadde ti skot og scorar på seks. Så eg er heilt ok nøgd. Men eg er i god form om dagen, og er kvitt betennelsen i hofteleddet som eg sleit med før nyttår. Noko som er veldig godt. Så eg gler meg skikkeleg til sesongen vidare, og håpar at eg kan gjera det bra og bidra for Tertnes. Eg har tru på eit godt år på handballbana, seier Tina.