– Nokon har hjelpt til med eld

Brannen utanfor den verneverdige Valebuo i går var truleg påsett.

 

Torsdag ettermiddag var Reidar Handeland, dugnadsarbeidar i Valestiftinga, på veg heim med ferja frå Skånevik til Utåker. Då fekk han telefon frå ein nabo på Valen som hadde observert at det brann like ved Valebuo.

– Det viste seg at det var full fyr i ein av pullertane som står på kaien, fortel Handeland.

Han nådde fram til staden etter eit kvarter, og då hadde badegjester som var i nærleiken sløkt elden.

– Det hadde vore både flammer og røyk. Kaien stod i fare, for det er mange kreosotpålar nedi der, og som kjent brenn det godt. Dermed kunne brannen ha spreidd seg til bua, opplyser Handeland.

 

Leik

Han valde å ta kontakt med brannvernet, i tillegg kom politiet til åstaden. Grunnen til det er enkel:

– Det ser ut for at nokon har hjelpt til med eld, og det vart konkludert at brannen var påsett. Vi ynskjer difor litt publisitet kring det som skjedde, for dette er ikkje greitt. Situasjonen kunne blitt mykje meir dramatisk, seier Reidar Handeland.

Det vart elles oppdaga at det hadde brunne i endå ein av stolpane på kaien. Like ved låg det grillkol, men om det har samanheng med ugjerninga, veit ein ikkje.

– Eg trur nokon har leika her, vurderer Handeland, som opplyser at det truleg er ingen som observerte nøyaktig kva som skjedde.

Det er ikkje til å koma i frå at hendinga har sett ein støkk i naboar og engasjerte i Valestiftinga. No får snikkarane i laget ein jobb med å vøla kaien.