Full køyrebok hos Johs. Hjelmeland

Framleis har transportselskapet Johs. Hjelmeland fulle dagar, men sjåførane tar sine forholdsreglar mot koronasmitte.

– Eg merkar stor endring i korleis ein oppfører seg. No er me ikkje utav bilen anna enn ved lasting og lossing. Me brukar sprit og eingongshanskar når me fyller diesel, og er veldig bevisste på å redusera risikoen for smitte mest mogeleg, seier Jørn Hjelmeland, dagleg leiar i transportselskapet Johs. Hjelmeland, til Grenda.

 

Maten med

Blant tiltaka er å ta med seg all mat han skal eta på ein tur.

– Det er slutt på å stoppa innom ein bensinstasjon eller kafé, seier Jørn Hjelmeland.

– Er eg uforsiktig, så er det ein stor risiko for smitte. Og smitte og sjukdom har ikkje me råd til, det vil stoppa oss. Me ynskjer jo heller ikkje å smitta nokon vidare heller. Det er eit tak for fellesdugnaden me tar, og det må me stå i alle, meiner han.

Når Grenda snakkar med Hjelmeland sit han på ferja mot Utåker, etter å ha vore til Skånevik Mekaniske Verkstad og henta nokre køyretøy som verkstaden har bygd om for Hydro Husnes.

– Me merkar tydeleg at det er ting me er borti som er stoppa på grunn av tiltaka rundt koronapandemien, men generelt susar og går mykje av det me er borti uavbrote. Slik det er no har me i alle fall nok å gjera på til forbi påske, vurderer Hjelmeland.

 

Kjem seg heim

Når styrehuset på ei Volvo trekkvogn er arbeidsplassen din, blir fylkes- og europavegar ein vesentleg del av arbeidsdagen. I førre veke var han ein tur til Kristiansand.

– Det er heilt ekstremt å sjå kor lite trafikk det er. Det var mest ikkje bilar å sjå. Nyttetrafikken går røft sagt som før, men privatbilane er i stor grad vekke. Parkeringsplassar utanfor butikkar og senter som me passarar har pleidd å vera fulle med bilar. No er det veldig redusert, observerer Hjelmeland.

Langtransportsjåførane har fått nye køyre- og kviletider å forhalda seg til etter at regjeringa tok koronagrep.

– Det er litt friare for oss no. I praksis kan me køyra to-tre timar lenger kvar dag. Det er for at dei som er friske skal kunna koma seg heilt heim, og sleppa overnattingar i bilen. I sum betyr det at me får vera meir heime, seier 46-åringen.

 

Europa

Oppdraga til Johs. Hjelmeland består i transport av alt mellom himmel og jord, samt litt kranbil, for å bruka Jørn Hjelmeland sine ord. I Norge rullar transporten bra, men utanfor landegrensene er det annleis.

– Me meklar mykje transport i Europa, og der er det store problem. Transporten stoppar opp, det er lang ventetid på tollstasjonar, fabrikkar blir stengte, ein får ikkje lasta. Karantenetid kjem oppå det. Det er store vanskar i nesten alle europeiske land for tida, og transporten tilsvarande dyrare fordi euroen har gått opp, sukkar Hjelmeland.

– Men kjerneverksemda er her lokalt, og den går enn så lenge bra, sluttar han.