Kommunen og eldresenteret, enno ein gong

Då kommunestyret nyleg diskuterte den bustadsosiale handlingsplanen, peika Øyvind Hardeland i Arbeidarpartiet på at det ikkje finst nokon avtale om at kommunen skal kjøpa to husvære i det nye seniorsenteret på Husnes. «Vi må seia nei, elles må vi gjera det same andre stader også», åtvara Hardeland, ifølgje Grenda 02.12.

Det er korrekt at det ikkje finst nokon kjøpsavtale mellom kommunen og seniorsenteret. Men Hardeland burde ha fått med seg kva partikollega Synnøve Solbakken sa i budsjettdebatten for to år sidan. Som representant for fleirtalskoalisjonen, sa ho klart og tydeleg at dei (kommunen) ville gå inn for å kjøpa to leilegheiter. Uttalen var ikkje til å misforstå, og blei svært godt motteken av oss som har arbeidd med prosjektet.

Vi er absolutt ikkje ute etter å hengja ut einskildpersonar, men denne saka har nok ein gong fortalt oss at ein ikkje alltid skal ta det ein politikar seier for god fisk. Elles registrerer vi at ordføraren er blitt oppmoda til å gå i dialog med arbeidsgruppa, og det same har kommunedirektøren tidlegare invitert til. Vi meiner eit slikt møte er bortkasta tid for begge partar, når vi no får vita at det ikkje lenger er politisk fleirtal for eit kjøp.

Om kommuneleiinga og ordføraren likevel vil gjera noko, er det gjerne ein idé å medverka til at folk som har dårlegare råd enn andre kan kjøpa seg inn i seniorsenteret, til dømes gjennom ordninga med startlån i Husbanken. Arbeidsgruppa kjenner til fleire personar som gjerne skulle ønskt seg eit lettstelt og sentrumsnært husvære, men som ikkje har råd til det. Det burde Øyvind Hardeland og andre merka seg. For no er det «vanlege folk sin tur»!

Arbeidsgruppa for Husnes seniorsenter

Roald Teigen, leiar

Kristian Hus, skrivar