Ragnhild vann IBU-cuprenn – og braut ein heilt ny barriere

Ragnhild Femsteinevik braut ein ny barriere som skiskyttar då ho vann laurdagens fellesstart i IBU-cupen. Hatlestrand-jenta innkasserte samtidig ein pen slump pengar. Det betyr også litt for ei som satsar alt på å bli best mogeleg i skiskyting.

– Dette er utan tvil mitt aller største augeblikk som skiskyttar. Eg er både glad og letta over at eg endeleg får det til. Eg har i fleire sesongar følt at eg har eit større potensial enn det eg har klart å ta ut i renn, sa Ragnhild etter at ho hadde klatra til topps på den internasjonale IBU-cuppallen for aller første gong. Det treng ikkje bli siste gongen ho står der. Frå før har ho ein tredjeplass som beste resultat i den settinga. Det var også eit høgdepunkt.

Ragnhild Femsteinevik vann mykje som rekrutt og junior. Hun fekk også ein god start på juniorkarrieren. Dei siste åra har fortona seg som ein aldri så liten berg- og dalbane-tur. Det har vore inn og ut av landslag, og både opp og nedturar for den energiske skiskyttaren som ikkje har late seg knekka av motgangen. Ho har jobba seg gjennom dei tunge periodane, og får no utteljing for det. Ragnhild gjekk mange gode renn førre vinter.

Gjekk tre IBU-cuprenn i Sverige

Løna for strevet kom i form av ein landslagsplass, og i førre uke gjekk ho tre IBU-cuprenn i Sverige. Det blei sjetteplass i eitt av dei. Femsteinevik toppa den prestasjonen då ho klinka til med karrierebeste og ein prestasjon som ho kjem til å hugsa så lenge ho lever. De betyr meir enn dei rundt 30.000 kronene minus skatt ho fekk for sigeren på Lillehammer. For ei av Kvinnherad sine fremste idrettsutøvarar hadde nådd eit mål ho hadde jobba lenge for.

– Kva er du mest fornøgd med etter din første internasjonale siger, Ragnhild?

– Det er utan tvil at eg klarte å gjera det eg hadde planlagt, og lukkast så godt som eg gjorde på standplass. Eg heldt hovudet kaldt og fokuserte på meg sjølv og blinken, sjølv om det var mykje som skjedde rundt meg. Denne gongen hadde eg ikkje så mykje krefter i bakkane som eg bruker å ha, sa ei glad Femsteinevik.

Det kan nok ha samanheng med at dette var hennar sjette renn på ti dagar.

La grunnlaget på standplass

Det var på standplass at Hålandsdalen-utøvaren la grunnlaget for triumfen. Ho merka tidleg i løpet at kroppen ikkje var så pigg som ho skulle ønska. Det handla, som ho seier, om å gå smart, og samtidig bruke minst mogeleg krefter. Det gjorde landslagsutøvaren, som disponerte kreftene og løpet veldig bra.

Ragnhild forstod at ho ville vinna då ho var først opp siste bakken, og hadde ei luke til dei andre. Den kjensla ho hadde då det gjekk opp for vinnaren at dette kom til å gå hennar veg, er det nesten umogeleg å skildra. Det vil nok ta tid før det verkeleg går opp for den nest eldste av de fem skiskyttarinteresserte søskena at ho har skrive seg inn i internasjonal skiskyttarhistorie.

Figurerer på eksklusiv liste

Ragnhild figurerer no på ei eksklusiv liste over utøvarar som har vunne IBU-cuprenn. Der er det mange celebre namn. Ho er no garantert å få vera med på den siste IBU-cuprunden før jul. Den startar den 16.desember i Østerrike. Det blir konkurransar der eller World Cup på Femsteinevik. Ho ser no fram til ein liten pause etter eit beinhardt konkurranseprogram den siste tida.

– Det skal bli godt å få lada batteria etter hektiske dagar. Eg må også få lagt inn treningsøkter før eg er klar for nye renn. Men eg må innrømme at eg gleder meg til framhaldet, seier Ragnhild som fekk julegåva på forskot i år. Den sørga ho sjølv for. Samtidig har den hardtarbeidande skiskyttaren fått ein fantastisk start på sesongen. Det at hun ho vinn eit renn med fire skytingar beviser at Ragnhild er stø nok på avtrekkaren når alt klaffar.