Stadig fleire vert utsett for trugande svindel – dette er råda frå politiet

Politiet har fått fleire meldingar frå personar som har motteke trugande krav i sosiale medium eller på e-post. No kjem dei med sine råd til kva du bør gjera om du vert utsett for slik svindel.

– Vår erfaring er at dei fleste av desse krava er svindel, og ein bør ignorera og rapportera dei. Opplever du slike krav, er dette våre råd, skriv Politiets nettpatrulje i ein Facebook-post som Politiet i Kvinnherad har delt.

Tre råd

* Ikkje betal. Dersom du vel å betala, vil det ofte følgja fleire krav der avsendar bed om meir pengar.

* Ikkje svar. Dersom du svarer avsendar, viser du at du er aktiv.

* Blokker avsendaren. Då forhindrar du at avsendar sender deg fleire meldingar.

* Rapporter brukaren. Dersom det er eit telefonnummer eller ein e-postkonto bør du blokkera nummeret eller markera e-posten som søppelpost. Dersom det er ein brukar på sosiale medium, rapporter gjerne brukaren i tillegg.

Truverdige

Det er råda som nettpatruljen har til dei som vert utsett for slike svindelkrav. Krav som ved fyrste augekast kan sjå truverdige ut.

– Desse meldingane er skrivne for å sjå truverdige ut, ved at avsendar hevdar å ha kjennskap til eit av dine noverande eller tidlegare passord. Dette kan vera fordi nettstaden der du brukar passordet kan ha hatt eit innbrot, skriv politiet og held fram:

– Innhaldet i denne typen svindel er ofte trugande. Avsendar hevdar å ha bilete av deg av seksuell karakter, eller hevda å vita kva slags pornografiske nettsider du har besøk. Krava kan innehalda ein tidsfrist og ein trussel om at manglande betaling fører til at bilete, videoane eller loggen frå nettlesaren din vert distribuert til vener og familie. Mange føler seg difor pressa til å betala, ofte i kryptovaluta. Kontakt gjerne oss i nettpatruljen dersom du har spørsmål om dette.