Skapar ein betre kvardag for brukarane: - Me er svært fleksible

– Eg er stolt og glad over at tiårsmåla eg sette meg for fire år sidan er oppnådde allereie no, seier gründer Janne Isdal Hvidevold i Sunn Omsorg AS.

I 2017 satsa Janne Isdal Hvidevold frå Halsnøy stort. Ho søkte om permisjon frå jobben i kommunen, og etablerte eigen pleie- og omsorgsbedrift. Ho ynskte å flytta sjefshatten over til dei ho verkeleg bryr seg om, og vekk frå tildelingskontoret og dei mange vedtaka.

Selskapsnamnet var i byrjinga Privat Omsorg AS, men som i sommar vart endra til Sunn Omsorg AS.

– Det er eit fint namn med dobbel meining. Ordet «sunn» kan stå for både Sunnhordland og omgrepet knytt til helse. Me er svært nøgd med det, seier Janne.

Halsnøybuen har sidan ho var seksten år arbeidd innan pleie og omsorg i kommunen. Med bedrifta ynskja ho å flytta sjefshatten over til brukarane, slik at dei sjølve kan bestemma kva dei har av behov og kor mykje tid dei treng.

– Eg såg behovet som var der. I dei kommunale tenestene er det nedskjeringar og vedtekter, og me fekk ikkje tid til å gjera meir enn det heilt nødvendige hos brukarane. I tillegg er det mange heimebuande som er einsame. Det å no få arbeida med å skapa ein betre kvardag for dei eldre er svært gjevande, fortel ho.

Selte delar av selskapet

I sommar selte gründeren delar av selskapet, og har no fått Stord Eigedomsforvaltning og Frank Søllesvik med på laget, der partane eig ein tredel kvar.

– Eg måtte ta eit val om eg skulle forbli der eg var, eller ekspandere. Eg kom fram til at det var heilt nødvendig med investor, og eg kunne ikkje vore meir nøgd med salet. Selskapet er verkeleg i rette hender, seier Janne.

Ho bestemde seg tidleg for at dersom selskapet voks seg større, skulle ho tilsetja ein dagleg leiar. Og då halvparten av selskapet vart selt, poengterte investorane at det var viktig å ha ein dagleg leiar tilsett på heiltid. Ho lyste dermed ut stillinga.

– Det å tilsetja ein dagleg leiar var for meg ein av dei viktigaste tinga, for eg ynskjer jo å vera ute med brukarane mest mogleg. Eg fekk mange søkjarar, noko som var svært kjekt. Men eg visste om Gunn, og oppfordra ho til å søkje. Heldigvis takka ho ja til tilbodet, og eg kunne ikkje fått ein betre dagleg leiar, smiler Janne.

Samstundes er det fleire støttespelarar med på laget. Bedrifta har nemleg to deltidstilsette som tar oppdrag når det trengs.

– Me blir stadig større, og me tek jo oppdrag i alle Sunnhordlandskommunane. Det er difor godt å ha flinke tilsette rundt seg. Eg er både stolt og glad over at tiårsmåla eg sette meg for fire år sidan er oppnådde allereie no.

Spennande og lærerik

Gunn Mehus frå Halsnøy er utdanna sjukepleiar og HMS-ingeniør. Då Janne ringde å oppfordra ho om å søkje, jobba ho som avdelingsleiar ved samhandlingsavdelinga på Husnestunet. Tidlegare har ho jobba ved Haukeland sjukehus, Haugesund legevakt og ved bedriftshelsetenesta AktiMed.

– Eg hadde ein fantastisk jobb i kommunen, men då eg fekk tilbodet hos Janne kunne eg ikkje takka nei. Det å få vera med å bygga opp noko heilt nytt såg eg på som svært spennande og lærerikt. Her får eg nytta begge utdanningane mine, og i tillegg får eg arbeida med eldre, noko eg likar svært godt, smiler dagleg leiar og held fram:

– Gjennom dei ulike tenestene eg har vore i, har eg sitt det store behovet som er der ute. Dette blir berre større og større, då det blir fleire eldre blant oss. Det er difor viktig å tenkja alternativt og tilby tenester som kan bidra til at eldre kan bu heime lengst mogleg, og at dei opplev å ha meiningsfylte dagar. Eg trur slike tenester er framtida, og difor er denne jobben både interessant og gjevande.

Samstundes meiner ho at Sunn Omsorg ikkje har som mål å ta over for dei offentlege tenestene.

– Me skal ikkje vera ein konkurrent til det offentlege, men heller eit supplement. Me ønskjer å vera ein god ressurs for brukarane, då me veit at mange har behov for ulike formar for hjelp og støtte utover det ein har vedtak på, fastslår Gunn.

Pendlar over fjorden

Gunn er no ansvarleg for den administrative delen av drifta, men er i tillegg ofte ute blant brukarane.

– Som dagleg leiar driv eg mellom anna med bedriftsstyring, marknadsføring og kvalitetsutvikling, i tillegg er eg mykje ute i felten saman med brukarane. Eg har fast kontorplass i Ibanken på Sæbøvik, men pendlar to dagar i veka til Stord og nyttar det nye kontoret i Helsehuset, seier ho.

I 2019 vart det gamle banklokalet i hjarta av Sæbøvik forvandla til eit moderne kontorlandskap med seks kontorplassar. Sunn Omsorg er ei av fleire verksemd som flytta inn då det vart opna.

– Det å arbeida i kontorfellesskap er svært kjekt og morosamt. I haust flytta me også inn i Stord Helsepark, så me pendlar med glede over fjorden, seier Janne.

Breitt spekter av tenester

Sunn Omsorg AS tilbyr alle eldre i Sunnhordland alt frå tradisjonelle heimetenester, til ein liten spasertur og kafébesøk. Målgruppa er eldre som ikkje får tilbod om hjelp frå kommunen, eller dei som har behov for fleire tenester enn det kommunen tilbyr.

– Kvar einskild person har ulike behov, difor er me svært fleksible i kva tenester me tilbyr. Me kan mellom anna hjelpe med praktiske oppgåver i heimen, slik at brukarane kan bu heime lengst mogleg eller nytte kreftene på det ein likar best. Dette kan vera hjelp til reinhald eller sengeskift, følgje til lege, hagearbeid, eller å handle daglegvare og lage middag. Me er fleksible, og oppteken av at brukarane skal oppleve besøkje meiningsfylt, føle seg trygg og ivareteken, seier Gunn.

Janne opplevde gjennom arbeidet sitt i heimetenesta at mange ynskjer meir enn det dei kunne tilby. No har ho fokus på å setja seg ned med brukarane, ta den gode praten og vera ein omsorgsperson.

– Mange eldre er einsame, og treng ein omsorgsperson. No når det nærmar seg jul kan me mellom anna hjelpe brukarane med juleforbereding. Nokre orkar kanskje ikkje å bake sjølve, og då kan me gjere det og brukarane kan vera med på det dei klarar. Slike dagar gir meg mykje, og forhåpentlegvis kjenner brukaren på det same. Det er eit svært meiningsfylt arbeid, der me både blir kjent og glad i brukarane våre, sluttar ho.