Ber om trafikksikring gjennom bygda

Løfallstrand Bygdelag ber kommune og politikarar finna fram gamle reguleringsplanar for trafikksikring gjennom bygda etter at «Kote 70» vart skrinlagt.

Trafikken på fylkesveg 48 gjennom Løfallstrand auka jamt sidan ferjekaien på Årsnes opna i 2010, og har no ein har no ein snittrafikk på 1700 bilar i døgnet. I fjor la ein bort planane om å flytta vegen utanom og over bygda, i dei fleste samanhengar omtala som «Kote 70» etter høgda i terrenget traseen var teikna inn i.

No ber bygdelaget om trafikksikring gjennom bygda, ettersom eksisterande trasé ser ut til å bli traseen for framtida.

– Med Kote 70 borte, vil det seia at det ikkje ligg nokon plan for utbetring av den smale vegen gjennom bygda vår no, skriv bygdelaget.

– Stor fart

I eit brev sendt ut til alle medlemmene i kommunestyret pluss samferdslekomiteen til Vestland fylke forklarer bygdelaget at frå opninga av Folgefonntunnelen i 2001 auka trafikktrykket gjennom bygda, noko som vart forsterka då ferjekaien vart flytta frå Løfallstrand til Årsnes.

– Den nye ferjekaien på Årsnes har medført både mykje større trafikk gjennom heile bygda og mykje styggare køyring, skriv bygdelaget.

Dei påpeikar at Statens vegvesen i 2005 laga ei vegutgreiing der dei prioriterte trafikktryggleik på topp fordi dette er tilførsleveg til eit ferjeleie.

– All erfaring viser at trafikkfarten er svært stor nær slike ferjeleie, og det kan bli vanskeleg å respektera nedsett fartsgrense på noverande veg. Etter trafikkprognosane vil ein ha ein ÅDT på 3000 køyretøy/døgn i 2025, som er ein vesentleg trafikkmengd i slike område, refererer bygdelaget.

Tidlegare arbeid

Opprusting av parsellen Røynholm – Geitebu av Fv 48 har vore drøfta i nærare 30 år. Då det pågjekk utgreiingsarbeid for vegsamband mellom Kvinnherad og Odda (Folgefonntunnelen), vart det for første gong formelt drøfta i eit planarbeid å etablera ein trasé for Fv48 gjennom Løfallstrand ovanfor busetnaden. Seinare har parsellen vore gjenstand for fleire utgreiings- og planarbeid, og bygdelaget nemner blant anna:

• Hovudplan for Kvinnherad – Odda (Folgefonntunnel) 1988 (Statens vegvesen)

• Gjeldande kommuneplan for Rosendalområdet, 2003 (Kvinnherad kommune)

• Vegutgreiing Rv 48 Løfallstrand – Årsnes ferjekai; parsell: Røynholm – Geitebu, 2005 (Statens vegvesen)

• Reguleringsplan Rv 48 Løvfall – Årsnes, 2006 (Statens vegvesen)

• Grovskisse for mulighetsanalyse; plan- og profilteikning for vegalternativ «kote 70», 2009 (Byggadministrasjon Harald Bjørndal AS)

• Vegutgreiing Statens vegvesen

Løfallstrand Bygdelag påpeikar at Fv 551, strekninga på frå Årsnes til Neslia er ein parsell med varierande vegstandard, og vekselvis skilta med 80 og 50 km/t soner.

– Det er vanskelege tilhøve for gåande og syklande på staden, utan fortau eller gang- og sykkelveg, og fleire plasser manglar det sikring.

Dei viser til trafikksikringsplanen for Kvinnherad 2021, som skildrar strekninga slik: «[Ho] er del av den gjennomgåande hovudvegen i Kvinnherad, og går dels gjennom utbygd område med busetnad og tun som ligg inn til vegen. På lengre sikt bør det vurderast å legge om hovudvegtraseen. På kortare sikt bør det gjerast TS-inspeksjon for å identifisere stader der det er trong for enkelttiltak.»

Føler seg utrygge

I kommunedelplan trafikktrygging 2021-2028 er følgjande tiltak på Løfallstrand høgt prioritert:

▪ Fortau/gang-/sykkelveg frå Løfall til Neslia

▪ Fartsputer ved byggefeltet på Gjerde

– Me føler oss utrygge på vegen gjennom bygda på grunn av den store trafikken og stygge køyringa til og frå ferja på Årsnes. I tillegg er det mykje tungtransport, bubilar og campingvogner på strekningen. Foreldre tør ikkje la ungane gå åleine sjølv korte strekningar på vegen. Det er fleire flaskehalsar der det dagleg skjer utrygge situasjonar, påpeikar bygdelaget.

– Me som bur på Løfallstrand har allereie venta i snart 20 år på utbetring av vegen gjennom bygda vår. Utbetringa vart sett på vent når traseen «Kote 70» gjennom Løfallstrand skulle bli utgreidd. No når den no er skrinlagt, forventar me at den ferdige reguleringsplanen som var klar 2005 vert henta fram att, slik at me kan få ein trygg veg gjennom bygda og til Rosendal, skriv dei i brevet.

Samde politikarar

Ein månads tid etter brevet vart sendt, har bygdelaget fått i underkant av ti svar tilbake.

– Alle er samde i at behovet er der, men alle seier at det er ein kamp om ressursane til vedlikehald. Det me synest er viktig å få fram er fortau og utbetring har stått på vent på grunn av «Kote 70». Når den no blir skrinlagt syns me det er feil at me skal koma bakarst i køen igjen, seier bygdelagsleiar Christian Mæland til Grenda.

Han meiner ei trafikksikring mot Rosendal og gjennom bygda vil gjera Løfallstrand til eit attraktivt byggjeområde, der det er tilgang på tomter.

– Eg veit om fleire som seier at Neslia til Omvikdalen er der dei ser etter hus, for der er det gang- og sykkelveg. Rosendal som område vil bli større med ei slik utviding, meiner me. Slik det er no, må løfallstrendingane omtrent køyra til Rosendal for å kunna gå seg ein tur på trygt vis, og vil barna til gamleskule for å leika på uteområdet, så må nokon vaksne i realiteten følgja dei dei, sluttar Mæland.