Festival med strykeorkester og stumfilm

Leif Ove Andsnes skal berre gjera unna eit par dagar ferie på Kjerringøy og éin konsert i London 1. august, før det er kammermusikkfestival for alt reimer og tøy held.

 

– Eg går ein ganske travel august i møte, etter å ha hatt ferie i juli. Det blir ein brå overgang, men eg gler meg noko valdsamt til festivalen i Rosendal, seier Leif Ove Andsnes på telefon frå Kjerringøy.

Den 1. august spelar han på BBC Proms i Royal Albert Hall i London. Deretter vender han nasa mot Rosendal Kammermusikkfestival, og musikken til Dmitrij Sjostakovitsj.

– Det blir mykje emosjonell musikk. Det ligg lett for russarane å snakka om kjensler gjennom musikken. Det er smerte, men også det andre som når hjarta. For oss musikarar er det jo kjensler me jobbar med, og me ynskjer jo at musikk skal handla om dei store kjenslene, og me ynskjer at publikum skal føla det me formidlar. Eg trur publikum i Rosendal skal få oppleva mange store kjensler, seier Andsnes til Grenda.

 

Stumfilm

I tenåra livnærte Sjostakovitsj seg som pianospelar på tre ulike kinoar i St. Petersburg. Det blir difor sett opp film for første gong under kammermusikkfestivalen.

– Det blir stumfilmframsyning med filmmusikk av Sjostakovitsj. Dette er andre gongen i historia at det blir gjort slik, første gong var for tre år sidan. Me opnar for popcorn, cola og laussluppen stemning i Riddersalen. Eg trur det blir ganske gøy, humrar Andsnes.

Årets festival er den første med eit fullt strykeorkester på scenen, noko festivalgeneralen har store forventningar til.

– Allegria String Ensemble er ein glimrande gjeng, som kjem til å gje publikum bakoversveis. Dei er eit svolte og spennande orkester som gjer mykje ulikt, og som er svært engasjerande. Dei skal opptre både på opningskonserten 8. august og på to konsertar på fredagen, fortel Andnes

 

Internasjonalt

Rosendal Kammermusikkfestival har eit godt namn ute i verda, noko som mellom anna kjem til syne på lista over media som har meldt at dei kjem.

– Me må nesten setja stopp snart, spøkjer Andsnes.

– Men det er tydeleg at programmet vårt fengjer interesse, og det er kjekt. No er ikkje det nødvendigvis det viktigaste; for meg er det viktigare at musikarar, publikum og alle som kjem til festivalen har det bra, men det er med på å gjera det lettare å rekruttera musikarar hit når internasjonal presse likar det dei opplever her, poengterer stjernepianisten.

Framleis er det råd å skaffa seg billettar til festivalen.

– Av ein eller annan grunn har me fått ord på oss å alltid vera utselt, men det er ikkje tilfelle. Me har selt bra så langt, men framleis er det plass att på alle konsertane, så det er rikeleg rom for kvinnheringar til å bli spontane og hiva seg med. Eg kan lova musikk som kjem til å treffa hjarta, sluttar Andsnes.