Tok avskjed med Totland

På søndag tok Fjelberg og Eid sokn avskjed med den populære presten Jan Ove Totland. Han vert no pensjonist, men opnar for å ta på seg vikaroppdrag.

Søndagens gudsteneste i Eid kyrkje vart litt utanom det vanlege. Det var nemleg avskjedsgudsteneste for Jan Ove Totland, eller Jan Ove Anders Høines Totland som er hans fulle namn. Etterpå vart han takka for tenesta lengst sør i Kvinnherad. Også denne avslutninga var gjennomført i kyrkja, for etter å ha rådført seg kring koronasituasjonen, valde ein å avlysa både nattverden og den planlagde kyrkjekaffien.

– Dermed vart det ikkje noko mingling i kyrkja, og folk sat på plassane sine heile tida. Det vart framført nokre helsingar til meg og eg fekk høyra nokre gode ord, i tillegg overrekte soknerådet blomar og presangar. Det var ei flott tilstelling, synest eg, fortel Totland.

Ein mannsalder sidan

I januar er det sju år sidan han vart tilsett som sokneprest i Fjelberg og Eid sokn. Før den tid var han sokneprest i Husnes og Holmedal sokn i 14 år. Der byrja han formelt den 1. januar 2001 då han overtok for Halvor Medhus. Men Jan Ove tjuvstarta i den jobben allereie hausten 2000 med undervisning av dei nye konfirmantane.

– Det er jo ein mannsalder sidan, smiler han, like blid som han er blitt kjent som.

Jan Ove Totland fyller 65 år den 29. desember. Pensjonist vert han to dagar seinare, men grunna avspasering tenkjer han å ta det roleg i nesten heile desember.

– Det einaste eg har på planen er gudstenesta på Varaldsøy julaftan, opplyser han.

Organiseringa av dei fire prestane i Kvinnherad har ført Jan Ove Totland innom alle kyrkjene i kommunen dei siste åra.

– Vi har ei ordning der alle prestane i Kvinnherad samarbeider. Vi har jo ansvaret for kvar våre sokn, men når det gjeld gravferder så har alle saman reist over heile kommunen. Til dømes har dei to siste gravferdene eg har hatt begge vore på Hatlestrand. Tidlegare var det tre prestegjeld med ganske tette skott mellom, men det har endra seg, informerer Totland.

Vikar i Nordfjord

Han har elles ikkje tenkt å verta gjerandslaus i sitt tilvære som pensjonist. Det kjem tydeleg fram når Grenda spør kva valebuen skal gjera no.

– Eg er bestefar i Eplehagen, det er livets dessert. Og så vil eg reisa og besøkja barnebarna i Oslo, Stavanger og på Lunner. Dessutan bur eg på ein fantastisk plass, med kort veg til både fjellet og fjorden, seier Jan Ove entusiastisk.

Samstundes røper han at prestekjolen neppe vert pakka vekk for godt.

– Det er flott å vera pensjonist, men det treng ikkje gå så lang tid før eg får lyst til å verta vikarprest. Eg er frå Totland ved Bryggja i Nordjord, og presten der skal no slutta, så det kan henda eg tek meg fire veker som vikar i vinter. Men ingenting er bestemt enno, fortel han.

– Men du blir buande på Valen?

– Å ja! Men sjølv om eg bur på Valen, så kan eg jo reisa til andre stader innimellom, ler Jan Ove Totland.

Ein enkel gut

Han ser med glede attende på tida som prest på Halsnøy og Fjelberg.

– Eg er veldig takknemleg for den gode måten kyrkjelyden tok i mot meg. Eg er jo berre ein enkel gut frå sjøkanten i Nordfjord. Elles vil eg takka for god helse og for familien min, og eg har trivst veldig godt med å vera prest, seier han.

– Det blir kanskje ein stor overgang å bli pensjonist?

– Ja, veldig. Då eg på måndag var på kontoret og tok ned bileta frå veggen og pakka bort fotografia av familien som eg hadde på pulten min, kjende eg på vemodet, det må eg vedgå. Men alt har si tid, fortel Jan Ove Totland.

Komande søndag er det innsetjingsgudsteneste i Eid kyrkje for den nye presten Carsten Mrusek.