Heidra for si frivilligheit

Det var ei lettare sjokkskadd Aslaug Elisabeth Torget Sjo som i dag fekk melding om at ho gjennom sin frivillige innsats får Frivilligprisen for 2016.

– Eg er ikkje heilt komen til bevisstheit enno, trur eg. Eg vart så overgidd, kan du tru. Ein tenkjer jo aldri i den retning, men så plutseleg ringte dei og sa eg hadde vunne pris. Å hjelpe meg, sa eg. Men det er jo sjølvsagt kjempestas, seier Aslaug Elisabeth.

Frivilligprisen går kvart år til ein initiativrik person, lokal foreining eller gruppe som gjennom sine idear og med sitt pågangsmot har betra trivsel og livskvalitet for andre. Og gjennom blant anna sitt brennande engasjement for eldresaka, har 81-åringen frå Halsnøy gjort det til gangs.

– Aslaug er sjølve symbolet på frivillig innsats. Fordi ho heile tida er oppteken av kva ho kan gjera for andre. Det vert sagt at ho ikkje eingong tenkjer over at det er det ho faktisk gjer, men at det berre er innebygd i ho at det er slik det må vera, skriv dagleg leiar Veronica T. Thorsen frå Kvinnherad frivilligsentral i ei pressemelding.

 

Seint og tidleg

Du kan sjå ho seint og tidleg, fleire gongar om dagen, hastande av garde og i all slags vêr. Og for prisvinnaren sjølv er det betaling nok å veta at ho har bidrege til at nokon andre får ein betre dag.

– Det er utruleg givande og det gjer også kvardagen min lettare. Det er nett så dagen vert meir meiningsfull med ein gong. Så er det jo sjølvsagt kjekt å kjenna at det ein balar på med gjer andre godt. Så eg set stor pris på denne prisen, seier Sjo.

– Ho er ikkje berre i kulissane, ho tek gjerne kommando over tilstellingar, både i regi av tysdagsklubbe, optimisten, Halsnøy og Fjelberg pensjonistforeining og andre institusjonar som treng frivillig og oppofrande innsats. Ho er alltid lett å be, og oftast treng ein ikkje be ho heller. Ho berre stiller opp, skriv Thorsen avslutningsvis i pressemeldinga.