Startar privat omsorgsbedrift

Janne Hvidevold (38) frå Halsnøy har starta opp bedrifta Privat Omsorg Kvinnherad, og skal saman med sine tre samarbeidspartnarar tilby ei rekkje omsorgstenester til bebuarar rundt om i kommunen.

– Sidan eg var seksten år har eg arbeidd innan pleie og omsorg her i kommunen, og eg har sett behovet som er der. Det er nedskjeringar og vedtekter, og vi får ikkje tid til å gjera meir enn det heilt nødvendige hos brukarane våre. Og det er det eg no ynskjer å gjera noko med, seier 38-åringen når Grenda møter ho heime rundt stovebordet på Halsnøy.

 

Såg behovet

Med bedrifta si ynskjer Hvidevold å flytta sjefshatten over til dei ho verkeleg bryr seg om, og vekk frå tildelingskontoret og dei mange vedtektene som finst.

– Eg ynskjer å gjera brukarane til sjef. Slik at dei sjølve kan bestemma kva dei har av behov og kor mykje tid dei treng. Det betyr jo mykje. Berre det å få eta saman med nokon, ha ein samtale eller å gå ein tur. Det er ting vi ikkje har så god tid til i dag, seier Hvidevold.

I eitt år har ideen surra og gått i hovudet hennar, men det var ikkje før for om lag tre månadar sidan at det verkeleg byrja å skje ting. Og onsdag etter påske var ho offisielt innehavar av sitt eige aksjeselskap. Og er no endeleg klar til å tilby dei som ynskjer det eit breitt spekter av omsorgstenester.

– No er eg ferdig med alt det kjedelege, men nødvendige papirarbeidet. Og er skikkeleg klar til å setja i gang. Det blir spennande å sjå om det er ein marknad for dette her i Kvinnherad, noko eg sjølvsagt trur det er, seier ho.

 

Ingen konkurrent

Privat Omsorg Kvinnherad er ikkje etablert som ein direkte konkurrent til tenestene Kvinnherad kommune i dag yter. Og verken Hvidevold eller hennar tre tilsette har planar om å seia opp jobben sin i kommunen.

– Alle i kommunen er kjempedyktige, og det er ikkje det at eg trur eg er noko betre enn nokon andre dette handlar om. For eg stortrivst i jobben min, men det handlar om at eg ser eit behov hos brukarane som eg no ynskjer å fylla, og hadde veldig lyst til å prøva dette, seier ho.

Med seg har ho Irene Røen, Jeanette Trovik og Monica Hansen.

– Dei er tre veldig dyktige damer. Så no gler vi oss til å starta og gjera kvardagen meiningsfull for dei som ynskjer der, seier ho.