Arne Alsaker fekk Målblomen

Onsdag kveld gav Kvinnherad Mållag heidersprisen Målblomen til Arne Alsaker og Kvinnherad Libris. Alsaker seier at Målblomen kom uventa, men synest det er veldig kjekt å bli sett pris på.

– Målblomen 2017 vert tildelt ei verksemd, men like mykje til personen bak. Alsaker har i lang tid synt eit språkleg medvit som fortener heider og ros, meinte mållaget.

Målblomen vart delt ut under årsmøtet til Kvinnherad Mållag i Uskedalen onsdag kveld. Grunngjevinga var at Kvinnherad Libris, med Arne Alsaker i spissen, har utmerka seg ved å ha eit variert og godt tilbod av bøker på nynorsk, både lokale og regionale bøker, skjønnlitteratur, lyrikk, sakprosa og barnebøker.

– Kvinnherad Libris er kjend for til ei kvar tid å ha eit stort boklager. Du finn det meste av nynorske bøker frå store forlag, men også frå mindre forlag som Skald, Selja og Kapabel, heiter det i ei pressemelding frå mållaget.

 

Naturleg med nynorsk

For bokhandlaren fell det naturleg å skaffa bøker på nynorsk. Lokale, nynorske bøker pleier å toppa salsstatistikken til Kvinnherad Libris, men Alsaker synest det var ekstra kjekt at også andre bøker på nynorsk toppa salet i fjor. Då selde han mest av Anna Gavaldi, som er omsett til nynorsk, og nynorskforfattaren Edvard Hoem.

– Eg har vore målmann heile mitt levande liv. For meg er det naturleg og sjølvsagt å bruka og prioritera nynorsk. Det er kort og godt ein del av identiteten vår. Dialekten vår viser at vi høyrer til ein plass, seier Alsaker.

Bokhandlaren synest det er viktig å formidla god språkbruk til andre. Det var til dømes ikkje nokon tvil om kva han meinte då Mosvoldgruppen ville marknadsføra Husnes Storsenter på bokmål.

– Det fekk vi hindra, slår han fast.

Mållaget peikar på at målkjensla til Alsaker vart styrkt i møte med rektor Sigurd Sandvik på Sunnhordland folkehøgskule 1962-63. Det stadfestar han kjapt.

– Det var ikkje nokon dårleg skule å gå i. Eg hadde også ein fenomenal norsklærar på landsgymnaset på Voss, fortel han.

Alsaker var aktiv medlem i Elevmållaget på Voss. Etter befalsskulen i luftforsvaret tenestegjorde han som troppssjef på Lutvatn ved Oslo. Han instruerte og kommanderte på nynorsk.

– Ikkje like enkelt i forsvaret den gongen, meiner Kvinnherad Mållag.

– Det var aldri noko problem. Eg modererte kanskje dei vanskelegaste uttrykka, til dømes «å gjera nokon ei beine». Men eg var kanskje både den første og den siste som kommanderte på nynorsk, ler målmannen.

 

Burde hatt rettskrivingskurs

Mållaget kallar Alsaker ei vaktbikkje for bruk av nynorsk, både internt i drifta av Husnes Storsenter, men også i høve til statlege og kommunale organ. Difor passa det han godt at rådmannen var invitert til årsmøtet for å leggja fram målbruksplanen til kommunen. På førehand sa han at han var spent på kva rådmannen ville leggja fram.

– For nokre år sidan satsa Kvinnherad kommune på å bli årets nynorskkommune, men når ein ser oppslag på til dømes sjukeheimen her på Husnes i dag, tenkjer eg at det er nokon som burde fått eit kurs i rettskriving. Nyleg fekk eg eit brev om el-tilsyn frå Kvinnherad kommune, skrive på bokmål. Akkurat no har ikkje Kvinnherad nubbesjanse til å bli årets nynorskkommune, meiner Alsaker.