Smitten aukar: – 37 smitta i Kvinnherad sidan fredag

Kvinnherad er no oppe i totalt 37 smitta sidan fredag, der dei fleste tilfella er knytt til utbrotet på Malmanger skule.

– Ein har oversikt over dei aller fleste, og såleis kontroll på utbrotet, skriv Kvinnherad kommune ei statusoppdatering på sine sider.

Dei bed også alle som deltok på ei minnesamling på Snikkeriet torsdag 11. november om å vera ekstra varsame for symptom.

– Vi oppmodar om å utsetja arrangement der mange treffast på kryss og tvers av bygdene, særskild i Rosendalsområdet.

I meldinga skriv dei også at nærkontaktar skal testa seg dag 1 og dag 5. Får ein ikkje testa seg så skal ein halda seg heime.

– Ein lyt halda aktiv eigenobservasjon i 10 døgn og halda seg heime sjølv ved milde symptom, skriv kommunen.

Er du husstandsmedlem eller tilsvarande nær, vil du få beskjed av kommunen kva som gjeld for deg.

– Hald barn heime om dei har nyoppståtte eller endra symptom. Ved restsymptom kan dei gå i barnehage, skule, SFO. Hald barnet heime til det er feberfritt og har god allmenntilstand, skriv kommunen.

Kommunen har kalla inn til pressekonferanse om koronasituasjonen klokka 13 onsdag.