Om politiske lovnader

Det har vore ein del negativ fokus på kommuneadministrasjonen denne hausten både i aviser og på Facebook, endåtil med ufine angrep på einskildpersonar. Vi ønskjer ikkje å nøra opp om misnøya som har kome fram, etter som vi i arbeidet med Husnes seniorsenter har hatt eit godt og tillitsfullt forhold både til kommuneleiinga og fleire andre i administrasjonen. Men no føler vi at prosessen med kommunalt kjøp av leilegheiter har stoppa litt opp, og at interessa per dags dato så å seia er lik null. Vi håpar dette ikkje er tilfelle, men at vi tvert imot kan stola på politiske lovnader.

Arbeidsgruppa for seniorsenteret vart etablert for snart tre år sidan (januar 2019). I gruppa var òg to representantar frå Kvinnherad kommune, som bidrog med gode tankar og kunnskap om korleis vi skulle gå fram for å få realisert prosjektet. At kommunen var representert, gav samtidig eit signal om at dette var noko vi stod saman om, og at kommunen verkeleg ønskte eit slikt prosjekt. I det politiske miljøet var det òg mykje velvilje. Vi fekk endåtil økonomisk støtte til forprosjektet.

Etter kvart dukka problematikken rundt habilitet og integritet opp, og kommunen sine medlemer i arbeidsgruppa måtte trekkja seg. Likevel opplevde vi ei positiv interesse i administrasjonen. Kommunedirektøren sa endåtil ved eit høve at ho applauderte prosjektet. Seinare har det vore lite fokus på seniorsenteret frå kommunen si side, men nokre politikarar har likevel heia på prosjektet under vegs. Det er bra!

For snart to år sidan hoppa arbeidsgruppa nærast i taket av glede då det under budsjettdebatten i kommunestyret blei sagt heilt konkret at koalisjonen ville at kommunen skulle kjøpa to leilegheiter i seniorsenteret. Endeleg skjer det noko, tenkte vi den gongen. Men der tok vi feil! No nærmar prosjektet seg fullføring (opning til sommaren), men kommunen er framleis fråverande. Kvifor det? undrar vi. Det er lett å tenkja seg at dette er eit døme på at ein ikkje alltid kan stola på det ein politikar seier.

I den bustadsosiale handlingsplanen, som no kjem til drøfting i fleire kommunale organ, kan vi lesa følgjande: «Seniorsenteret på Husnes er eit strålande døme på at folk tek ansvar for eigne liv med tanke på alderdommen og kva som ventar dei. Dette vil styrke sjølvkjensla og gjera folk i stand til å delta i samfunnet rundt seg».

Men når det kjem til konkrete investeringar, er ikkje seniorsenteret nemnt med eit einaste ord i planen. Det er skuffande. Her burde sakshandsamaren teke dei politiske signala, og gjeve klart uttrykk for at Kvinnherad kommune skal kjøpa to leilegheiter, slik det blei sagt for snart to år sidan.

Men det er framleis håp, til dømes i samband med budsjettet for 2022, som politikarane no arbeider med. Der har dei sjansen til å øyremerka midlar til det omtalte prosjektet, slik koalisjonen har sagt. Vis oss at ein kan stola på det som blir sagt frå talarstolen i kommunestyret, og at det ikkje berre var tomme ord. Vi set elles vår lit til den nye ordføraren, som på innsetjingsdagen sin sa til pressa at ho ville vera ein «ja»-ordførar. Det lovar godt!

Arbeidsgruppa for Husnes seniorsenter

Roald Teigen, Otto Blokhus, Aud Sigrun Fausk og Kristian Hus