Kvinnherads sterkaste pappa er bestefar

– Ikkje verst av ein bestefar, smilte Svein Ørjan Saghaug.

Dagen før farsdag inviterte Husnes Storsenter og TrimX i fellesskap til kåringa «Kvinnherads sterkaste far». Oppgåva var enkel, om enn ikkje lett: Kven klarte å ta flest repetisjonar i benkpress når det ligg 50 kilo på stonga.

Svaret skulle koma allereie på første far som prøvde. Svein Ørjan Saghaug vippa stonga opp 62 gongar.

– Eg tok det som ei oppvarming før eg for på TrimX og tok ei treningsøkt, smilte Saghaug då han mottok førstepremien etter at konkurransen var over.

Eigen heiagjeng

Christopher Brix og Tore Blom tok arrangøransvaret på vegner av trimstudioet. Dei kunne registrera at konkurransen som fann stad midt inne på storsenteret trekte nokre fedrar som var villige til å måla styrken sin, men kanskje ikkje så mange som dei hadde håpa på.

– Det er likevel kjekt å by på seg sjølv på eit slik vis som dette, og det er sporty gjort av dei som stiller opp, meiner Brix.

Blant dei som la seg i benken for å testa seg var Arne Torget, som vart godskriven med 29 løft av ein snill dommar.

– Eg opererte skuldra for nokre år sidan, og får ikkje sleppt stonga så langt ned, kommenterte han etterpå.

Rune Guddal stilte med døtrene Eli og Liv som heiagjeng, og dei syns uansett at dei har Kvinnherads sterkaste pappa, uavhengig av om 28 repetisjonar heldt til siger eller ikkje.

Storsenteret sponsa hovudpremien, medan TrimX kasta inn to månadsmedlemskap med rettleiing som ein andre og tredje premie.

– Eg skulle uansett på TrimX og trena etterpå, så eg heiv meg like godt med her, seier 50-åringen.

– Men det er ikkje verst av ein bestefar dette, vel? Eg kastar ut ei oppmoding til andre eldre om å hiva seg på trening, det er noko ein har godt av. Og no sit eg att med 2500 kroner eg kan å bruka på julepresangar til gutane eg er far til, smiler firebarnsfaren nøgd.