Søkjer om éin million kroner til felles pilotprosjekt

Havforskingsinstituttet, Eide Fjordbruk, Lingalaks og Bremnes Seashore søkjer Kvinnherad kommune om éin million kroner til eit felles pilotprosjekt for å bekjempa lakselus og annan smitte.

– Vi søkjer økonomisk tilskot frå Kvinnherad kommune til eit samarbeidsprosjekt, for å analysera mogleg effektar av å ta i bruk lukka merdar i sjø i kombinasjonsdrift med vanlege opne merdar for å bekjempa lakselus og annan smitte knytt til lakseoppdrett i fjorden, skriv Havforskingsinstituttet i eit brev til Kvinnherad kommune.

Dei søkjer saman med dei tre oppdrettsselskapa Eide Fjordbruk, Lingalaks og Bremnes Seashore om prosjektstøtte på éin million kroner frå Kvinnherad kommune.

– Midlane vil i sin heilskap gå til å finansiera forskartid på Havforskingsinstituttet og driftsmidlar for å reise til prosjektmøter, står det å lesa i søknaden.

Hovudmålet med prosjektet er å utforma og testa modellscenario for kombinasjonsdrift av lukka og opne merdar i sjø med tanke på å redusera lakselus-smitte, anna smitte og anna miljøpåverknad i Hardangerfjorden som eit pilotområde.

– Målet er å identifisera realistiske, miljømessige og økonomisk berekraftige løysingar for lakseoppdrett i fjordsystemet, skriv dei i søknaden.