Fyller Flyt med juleutstilling
Av, i og frå naturen er slagordet når Kjell Musland, Espen Attramadal og Jorun Larsen opnar julegalleriet på Flyt aktivitetshus i Rosendal 27. november.
Kjell Musland er fødd i Uskedalen, men bur no på Seimsfoss. Han er kjend for sine humoristiske og uttrykksfulle figurar i tre. Interessa for treskjering oppdaga han i 1978, då han skar sin første figur. Musland har drive med treskjering sidan, og jobbar både med motorsag og kniv.
Arbeida hans kan ein finna over heile landet, og den mest kjende, figuren av Edvard Grieg, står ved Hotel Ullensvang i Lofthus. Til julegalleriet kjem han med små og store trekunstverk.
Artikkelen held fram under annonsen.
Espens Verd
Espen Attramadal kjem frå Røros, men flytta til Kvinnherad i 2016, kor han har arbeidd som keramikar, kunstnar og lærar i kulturskulen sidan. Med dei fantasifulle og fargerike figur-seriane sine har han introdusert Espens Verd gjennom fleire utstillingar.
Fleire av dei kjende keramikkfigurane hans vil også vera til stades under denne utstillinga, samstundes som han stiller ut måleri, kor born sine eventyrlege møter i naturen er i fokus.
Saltprint
Jorun Larsen kjem frå Fitjar, men er busett på Seimsfoss. Ho jobbar med fotografi, og i julegalleriet presenterer ho mellom anna nokre arbeid frå 2020. Då landet stengte ned vart naturen ein særskilt viktig stad for henne. Saman med borna sine samla ho planter frå turane dei var på. Desse vart pressa og tørka, og dernest nytta til å lage saltprint. Papiret er fukta med saltvatn iblanda tårer, noko som har gjeve biletserien namnet «Tearprint», og fotografia er eksponert med dagslys.
15. desember vert det dessutan juleutstillingsverkstad i galleriet. Kjell Musland dreg i gong motorsaga for å demonstrere korleis han jobbar, og Espen Attramadal vil halde teiknekurs med born og unge.
Under opninga blir det jazza julemusikalske innslag ved Rebekka Attramadal. Saman med Arne Martin og Maren Guddal Husby ønskjer kunstnarane hjarteleg velkommen til ei salsutstilling på Flyt, kor natur, eventyr og forundring står i fokus. Utstillinga står ut året.