– Frustrasjonen har bygd seg opp

I juni søkte Utåker Musikklag kommunen om refusjon av utgifter til dirigenttenester, for å letta den økonomiske situasjonen i laget. Dei har enno ikkje fått svar. Medlemmene i laget må difor grava djupt i eigne lommer for å behalda dirigenten sin, Linas Dakinevicius.

Oddvin Heimvik, leiar i laget, har purra på kommunen gjentatte gonger. Seinast i eit brev til ordføraren og kommunedirektøren, datert 5. november. Då Grenda vitja Heimvik på Utåker 10. november, hadde han enno ikkje høyrt noko frå kommunen.

– Ein blir jo frustrert og lei når ein ikkje får svar, og dette er heller ikkje snakk om eit eingongstilfelle, sukkar han.

Oddvin har leia fleire lag opp gjennom tidene, mellom anna har han vore engasjert i Utåker Musikklag i vel 50 år, og i Norsk forbund for utviklingshemma (NFU) i meir enn 30 år. Han er såleis røynd innan frivilligheita i kommunen, og basert på eiga erfaring hevdar han at det var enklare å samarbeide med kommunen for ti år sidan, enn det er i dag.

«Har vore med og drive frivillig lagsarbeid og frivillighetsarbeid i kommunen i fleire tiår. Men no er prikken over i’en sett.»

Heimvik ønskjer ikkje å opplevast som grinete, men meiner det er gått for lang tid utan tilbakemelding på søknaden.

– Om svaret blir positivt eller negativt er ikkje så nøye, men det er viktig at me får eit svar, så kan laget drivast der etter. No går me berre i uvisse. Eg kikkar i postkassa kvar dag, men er like lang i nasa då eg kjem ned att, seier han oppgitt.

Fredag 12. november kunne kommunedirektør Ragnhild Bjerkvik fortelja at svaret frå kommunen var på veg.

– Me har vore oppmerksam på saka, men her har det gått alt for lang tid, det er eg heilt samd i, beklagar ho.

Kompensasjonsordning for dirigenttenester

Saka Utåker Musikklag har venta svar på er denne:

Den 30. april i år vart det gjennomført eit dialogmøte med representantar frå ulike lag, kor Kirill Zimin, rektor i Kvinnherad kulturskule, og jurist Kim Gundersen informerte om kommunen si kompensasjonsordning for kultur. Gjennom denne ordninga kunne ein søkje om å få refundert utgifter til dirigenttenester.

Utåker Musikklag var blant dei som søkte om kompensasjon for dette, då all aktivitet frå 16. november 2020 til 31. mai 2021 stoppa opp grunna koronapandemien. Søkesummen var på 34.200 kroner.

I søknadsbrevet, sendt 9. juni, vart det samstundes peika på at ein refusjon ville vera viktig for at dei kunne koma seg vidare i sitt unike samarbeid. Her informerte også Heimvik mellom anna om følgjande:

«Utåker Musikklag, som består av utøvarar frå Etne, Skånevik, Sandvoll, Valen, Høylandsbygd og Sunde, utgjer eit unikt samarbeid som står i fare, då prisen vert for høg i forhold til den vara dei får gjort nytte av.»

Vidare vart det gjort reie for at musikklaget heller ikkje hadde hatt høve til å gjennomføre inntektsbringande aktivitetar i denne perioden, også dette grunna pandemien.

12. september hadde musikklaget enno ikkje fått svar på søknaden, og Heimvik sende den første purringa til kommunen. Den 5. november sende Heimvik enno eit purrebrev til kommunen, som førte til at Grenda tok kontakt.

Vil gje seg

I sistnemnde brev kom Heimvik dessutan med eit PS:

«Har vore med og drive frivillig lagsarbeid og frivillighetsarbeid i kommunen i fleire tiår. Men no er prikken over i’en sett.»

– Meiner du at du gir deg som leiar?

– Ja, no er både frustrasjonen og alderen på plass for å gje seg. Eg har passert 80, dermed blir det tyngre å stå i det når det buttar i mot. Hadde ting gått på skinner, ville det vore lettare å haldt fram, medgir Heimvik.

Mange frustrerte

Den økonomiske situasjonen i Utåker Musikklag har ført til frustrasjon også blant dei vel 25 aktive medlemmene i laget, som personleg har bore den økonomiske byrda for å kunne halde fram med Linas Dakinevicius som dirigent.

– Nokre tykkjer jo det er greitt å betale ekstra i kontingent, men enkelte synest det blir i meste laget. Det er også dei som har gjeve uttrykk for at det vert for dyrt for dei no, og då har laget gått inn og subsidiert, forklarar Heimvik.

Han håpar at den komande farsdagskonserten som Høyåker Musikkorps inviterer til førstkomande søndag, samt basarane laget arrangerer i Skånevik på laurdag og i Høylandsbygd på måndag, vil bidra til å betre økonomien i laget.

– Det er jo snart eit halvt år sidan søknaden vart sendt, så eg vil sei me har vore ganske tolmodige i denne saka, sluttar han.