I finalen om å bli årets nynorskkommune

Kvinnherad er for andre året på rad i finaleheatet i kampen om å bli årets nynorskkommune.

I finalen møter Kvinnherad tøff konkurranse frå Ål, Stad og Herøy kommunar.

Prisen skal gå til ein kommune eller fylkeskommune som tek særleg godt vare på det nynorske skriftspråket.

I 2021 har juryen sett spesielt etter kommunar og fylkeskommunar som har gjort ein ekstra innsats for skaffe nynorske læremiddel og læringsressursar til skuleelevane sine, går det fram av Språkrådet sin omtale av kåringa.

– Det har vore sterk konkurranse om prisen i år. Fire kandidatar er med på oppløpssida, alle med sterke tiltak for å tryggje nynorsk som bruksspråk på viktige samfunnsområde, seier Margrethe Kvarenes, seksjonssjef i Språkrådet i ei pressemelding om konkurransen.

Kvarenes leiar juryarbeidet på vegner av Kulturdepartementet. I juryen sit også representantar for Nynorsk kultursentrum, Landssamanslutninga av nynorskkommunar, Noregs Mållag og KS.

Kjerneområde mot randsone

Tre av dei fire nominerte kommunane ligg i trygge nynorskområde.

– Herøy i Møre og Romsdal og Kvinnherad og Stad i Vestland syner solid språkleg sjølvkjensle og er gode døme på kva ein bør gjere som kommune for å halde nynorsken oppe som bruks- og kulturspråk, skriv rådet om finalistane.

Om Kvinnherad seier Språkrådet at kommunen syner òg til slitesterke tiltak over tid, og skal særleg ha ros for å vere medviten om tilhøvet mellom integrering og språkbruk.

Herøy syner til gjennomtenkte nynorsktiltak i barnehage og skule og nyttar marknadsmakta si godt i val og utvikling av læremiddel på nynorsk.

Stad kommune har gode rutinar for systematisk arbeid, og kommunen viser til særleg gode og varierte kulturtilbod på nynorsk.

Ål er utsidaren i årets finale. Kommunen ligg i Hallingdal i Viken, der nynorsk ikkje er eit sjølvsagt språkval, slik det er i kjerneområda for nynorsk. Ål kommune viser at dei lokale tiltaka for å styrkje nynorsken er trygt forankra i det kommunale planverket. I praksis imponerer kommunen særleg ved medviten bruk av nynorsk i kultur- og næringslivet.

Kultur- og likestillingsminister Anette Trettebergstuen deler ut prisen

Prisutdelinga vil finne stad på eit ope arrangement på Litteraturhuset i Oslo 22. november, i Bernerkjellaren klokka 09.45. Prisen, som er på 100 000 kroner, blir delt ut av Kulturdepartementet.