Ny drift i Høylandsbygd

Like før jul kjøpte Gerhard Meidell Alsaker store delar av konkursramma Eide Marine Service. No sørgar laksekongen for ny drift i Høylandsbygd, skriv Bergens Tidende.

– Vi er tilbake i marknaden, men i mindre målestokk enn før. Vi operer ikkje lenger world wide, men konsentrerer oss om oppdrag i Norden. Så langt ser det lovande ut, seier administrasjonssjef i Eide Marine Contractors, Kjartan Mehammer til Bergens Tidende.

Det kan dei takka Gerhard Meidell Eide for. Like før jul kjøpte oppdrettskongen store delar av konkursbuet for 103 millionar kroner. Noko som omfatta fem store kranfartøy, sju lekterar og to slepebåtar. I tillegg til det punga Alsaker no på måndag ut for det største fartøyet i konkursbuet, Eide Barge 33. Og det er desse fartøya som dannar flåten til det nye driftsselskapet Eide Marine Contractors, og som gjennom fleire nye kontraktar i desember no er sett i arbeid.

– Januar og februar er tradisjonelt rolegare, men vi ser ein lysning i marknaden og trur på fleire oppdrag innan oljerelatert virke. Vi prøver òg å få fleire bein å stå på, med oppdrag innan infrastruktur som bru- og vegbygging samt vindmølleindustrien, seier Mehammer til BT.

 

Billegsal

Bergens Tidende skriv i sin artikkel at Alsaker har fått konkursbuet billeg.

– Eg har betalt det som var prisen. Marknaden er inne i ein lågkonjunktur. Når ein kan kjøpa ei krone for ti øre, viser det korleis situasjonen er, seier Alsaker til BT og forklarar samstundes at han ikkje vil leggja seg opp i drifta.

– Det er slik at når ei bedrift er i krise så går det veldig mykje tid og ressursar til å skaffa pengar for å overleva, og mindre på å skaffa kundar som kan gje langsiktige inntekter. Eg håper å ha bidrege til at dei tilsette no kan bruka tida på å driva selskapet. Finansieringa tek eg meg av, så tek dei andre seg av drifta, seier han.

Han føler seg samstundes sikker på at det skal vera mogleg å driva godt i Høylandsbygd.

– Eg har investert såpass mykje pengar på dette på grunn av at eg føler meg rimeleg sikker på at det er mogleg å tena pengar på drifta. Men sjølvsagt, hadde selskapet låge i Trøndelag så hadde vi ikkje vore interessert. Vi har tross alt anna å bruka pengar på, seier Alsaker.