Gjeninnfører unntak frå fråværsreglane

Elevar med symptom må ikkje gå til fastlegen sin for å dokumentera fråværet. Regjeringa har nemleg innført unntak frå fråværsregelen ut skuleåret.

– Elevar med milde symptom skal ikkje føla seg tvungne til å gå på skulen fordi dei er redde frå fråvær. Dette vil seia at elevar med symptom heller ikkje treng å dra til fastlegen for å dokumentera fråværet. Koronapandemien er ikkje over og difor må vi tilpassa fråværsreglane til den situasjonen vi no står i, seier kunnskapsminister Tonje Brenna (Ap) i ei pressemelding.

Reglane som regjeringa no innfører er dei same som var gjeldande fram til 11. oktober i år, og nesten heile førre skuleår. Dette skjer på grunn av at ein no opplever ein auke av smitte i samfunnet, og også fleire sjukehusinnleggingar.

– Som kunnskapsminister er mitt mål at elevane skal vera mest mogleg til stades på skulen. Det er heilt avgjerande for at dei får sosial tilhøyrsle til klassen og den faglege oppfølginga dei treng. Men fråværsreglane gjer det vanskeleg for elevane å følga smittevernråda og samtidig vera mest mogleg på skulen, og difor er det no rett å gjeninnføra unntaket frå fråværsgrensa, seier Brenna.