Prestisjepris til Postvegen

Torsdag vart den 2,5 mil lange postvegen frå Ølfernes til Herøysundet tildelt årets kulturlandskapspris i Hordaland, ei pengegåve på 50.000 kroner.

– Pengegåva kjem godt med til vedlikehald av vegen, og blir direkte omgjort til grus og diesel til traktor, seier Ove Tvedt, eldsjel og leiar i Interesselaget for Postvegen.

Med fokus på stiar og ferdselsvegar gjennom jordbrukets kulturlandskap, var det ingen av dei sju andre bidraga som klarte å hamla opp med den gamle postvegen. I meir enn 20 år har det vore lagt ned enorme mengder dugnadsarbeid for å få opp traseen, og Ove Tvedt er stolt over at det vert sett pris på.

 

– Heilt rett

– Eg synest det er stor stas at vi blir tildelt denne prisen, og meiner at kulturlandskapsgruppa har valt heilt rett. Vi er mange som har lagt ned mange årsverk i dugnadsarbeid på postvegen, og prisen går til alle dei som har vore med å bidrege, seier Ove Tvedt.

Prisen vart feira med bollar og kaffi ved Gamle Helland bru, spasertur langs delar av traseen og felles lunsj i Raualøa seinare på dag. Med i følget var ein representantar frå dugnadslaget, fylkesmannen, fylkeskommunen, vegvesenet, kommunen, turlaget, landbruksrådgjevinga og kvar skulekrins i interesselaget .

Nils Nonos, regionsansvarleg for veghistorie i Statens Vegvesen, meiner at postvegen er unik på landsbasis. Og trekker fram den universelle utforminga av vegen som ein hovudfaktor for at Postvegen gjekk til topps i konkurransen.

– Dette er definitivt den største dugnadsinnsatsen på landsbasis når det kjem til liknande prosjekt.

Det er eit topp initiativ som er heilt unikt samanlikna med andre. Det at dei har fått til ein universell veg som er lagt opp slik at folk i alle kan nytta seg av han, gjer at det absolutt er ein verdig vinnar, seier Nonos.

 

– Fantastisk tilbod

På spaserturen møtte følget Solveig Rørvik, tvillingjentene Anna og Sara (4) og vognpassasjer Erlend (9mnd). Dei nyttar Postvegen dagleg, og er veldig takknemleg for det arbeidet dugnadsgjengen har lagt ned.

– Vi bur nett oppi her og brukar vegen omtrent dagleg. Anten vi skal til Husnes på handel, levera barna i barnehagen på Valen eller berre ta oss ein treningstur. Det er eit fantastisk tilbod som vi er utruleg glade for at vi kan nytta oss av, seier Solveig Rørvik.