Seier nei til turistkai

Fylkesmannen går sterkt imot Manfred Hitzler sine planar om å byggja ein kai for tyske fisketuristar på Ænes.

I desember handsama forvaltningskomiteen ein søknad frå hytteformidlar Manfred Hitzler. Han ynskjer å byggja ein kai på 10x5 meter med plass til 3-4 båtar nord for Ænes. Kaien skal brukast av tyske turistar som leiger hytter i området. Administrasjonen innstilte negativt, medan politikarane ikkje såg nokon grunn til å seia nei, og gjekk difor samrøystes inn for søknaden.

No har Fylkesmannen kome med sin uttale i saka. Han tykkjer kaien vil medføra ei oppsplitting av strandsona.

– Den vil få ein privatiserande verknad og dela opp samanhengen i strandsona langs strandlinja. I hovudsak støttar vi administrasjonen si vurdering av tiltaket på dette punktet, heiter det i uttalen.

Vidare vert det påpeika at ein kai på 50 m2 er å rekna som eit stort byggjetiltak i strandsona.

– Fylkesmannen kan ikkje sjå at det er behov for eit såpass omfattande byggverk for å sikra eit par båtplassar til nokre hytteeigedomar, står det.

 

Mangelfull

Spesielt den siste setninga får leiar i forvaltningskomiteen, Øyvind Utne (H), til å reagera.

– Det verkar som at Fylkesmannen ikkje har forstått saka, for dette handlar om næring. Uttalen er såleis i strid med statlege retningslinjer, seier han til Grenda.

Utne er heller ikkje nøgd med kommuneadministrasjonen si saksutgreiing.

– Utgreiinga var mangelfull, for ho inneheld ikkje eitt einaste ord om næringsaktivitetane. Det er svært uheldig at ikkje kommunen får fram slike positive moment i sakspapira, kommenterer han.