Jørn vart samlagsmeister

På laurdag skipa Hardanger Skyttarlag til samlagsstemne i Tørvikbygd. Igjen markerte skyttarane frå Varaldsøy seg sterkt. Denne gong var det Jørn S. Haukenes som imponerte mest.

81 skyttarar tok turen til Vangdalsåsen ved Tørvikbygd på laurdag. Der deltok dei i det utsette samlagsstemnet på 15 meter bane. Seks av skyttarane representerte Vareld Skyttarlag.

– Nokre av oss reiste vel kanskje med forhåpning om å gjera eit godt stemne, andre med litt mindre tru, fortel leiar Jan Åge Thingvoll.

Han legg til at Vareld er i den heldige situasjon at dei har ei breidde med rekruttar som sjeldan sviktar.

– Det har vist seg gong etter gong, slår Thingvoll fast.

Ingenting avgjort

Og det slo til også i samlagsstemnet. No var det Jørn S. Haukenes som kunne ta i mot premiar og titulera seg som Samlagsmeister. Han vann nemleg klassen for rekrutt 11-13 år, der det var 14 deltakarar.

– Ingenting var avgjort før siste laget hadde skote, og det gjorde det nok ekstra spennande for Jørn, og ikkje minst for Besten (Erling Skjelnes). Trur nok begge var nøgde då dei tok fatt på heimturen, opplyser Jan Åge Thingvoll.

Kan skifta på

Jørn S. Haukenes hadde 246 poeng (147+99) etter innleiinga. I finalen slo han til med 97 poeng, dermed 343 totalt, noko som heldt til siger, to poeng føre sølvvinnaren frå Jondal. Tvillingbror Asle vart nummer 5 med sine 335 poeng, medan Stian V. Gjuvsland vart nummer 8 med 330.

– Stian og Asle nådde ikkje heilt opp denne gongen, men det er bra at dei er tre som kan skifta på pallplassane, meiner Thingvoll.

Elles kan det nemnast at Trygve Djuvsland kom på delt 3. plass og Nils Jakob Tveit på 7. i klasse V65. Jan Åge Thingvoll vart nummer 11 i klasse V73.