– Dette er midt i blinken for meg

Torsdag opna kontorfellesskapet og møteplassen iBanken dørene på Halsnøy. Her dreg i dag fem forskjellege verksemder god nytte av kvarandre.

Etter ei tid med oppussing og planlegging, opna møtestaden og kontorfellesskapet iBanken dørene på Halsnøy torsdag. Det gamle banklokalet i hjarta av Sæbøvik er forvandla til eit moderne kontorlandskap med seks kontorplassar. Av dei er fem allereie tekne, i eit av dei held Emma-Kristin Ringheim Reigstad frå Store Ringheim hotell og restaurant på Voss hus. Ho pendlar mellom ekstremsportvogga og basarholmen kvar veke, og har gjennom det nystarta kontorfellesskapet iBanken fått på plass eit tilbod ho har sakna.

– Dette er midt i blinken for meg. Det å koma seg ut av pysjen og ut i eit fellesskap i staden for å sitta heime på heimekontoret er heilt fantastisk, seier Emma-Kristin.

 

Kreativ møteplass

Å skapa meir liv i Sæbøvik sentrum, få på plass eit fellesskap og samstundes gi folk med heimekontor eit skikkeleg tilbod var hovudgrunnane til at Stian Irgens Normann frå iSentrum AS satsa på dette kontorfellesskapet. No er fem av seks kontorlokale fylte. I tillegg til Store Ringheim hotell og restaurant, har også Tveit Rekneskap, Aktiv Eiendomsmegling Sunnhordland, Privatomsorg Sunnhordland og Tysnes Sparebank flytta inn.

– Det er kjekt at vi no har fått på plass ein kreativ møteplass. Ein plass der vi kan dra nytte av kvarandre og dela erfaringar. I tillegg så skal det vera ein stad der folk kan koma innom, setja seg ned og jobba. Anten det er folk med heimekontor, turistar som må jobba litt i ferien eller kven som helst. Er det lys i lokalet så er det berre til å koma innom, seier Silvia Tofte frå Tveit Rekneskap.

For Daniel Haugland og Tysnes sparebank var dette eit tilbod heilt etter deira and og som dei er glade dei har blitt ein del av.

– Det er viktig for oss å vera der folk er, rett og slett. Og det får vi her, i tillegg så blir vi ein del av eit fellesskap der vi kan dela erfaringar med dei andre som held hus her. Og så er det jo inspirerande å halda hus i så flotte lokalar, seier Haugland.

I tillegg til å leiga ut kontorplassar, vil iBanken tilby «klippekortavtalar» der dei som ynskjer det kan leiga seg ein stol i ein viss periode.