Humor og helse i Senioruniversitet

Prost Svein Arne Theodorsen er første gjest hos Senioruniversitetet denne våren. Torsdag 11. januar kjem han til Rosendal for å kåsere om «Humor og helse – ein god latter forlenger livet».

Det er semesterstart i Senioruniversitetet i Kvinnherad torsdag i neste veke, med vekt på kva effekt humor har på vår helsetilstand.

– Theodorsen vil kome med refleksjonar over tema med rikeleg med døme på humor, mykje frå eige liv og teneste, skriv senioruniversitetet i ei pressemelding.

 

Brei bakgrunn

Teologisk konservativ, leiarstrategisk progressiv. Slik trudde Sunnhordland-prosten at han blei oppfatta då han, ein fiskarson frå Farsund, vart innsett som ny prost i Sunnhordland og sokneprest i Stord 11. august 2001.

– I tillegg til teologiutdanninga har han mellom anna utdanning i pedagogikk og leiarfag, og han hadde fleire ulike leiar- og undervisningsstillingar før han kom til Stord. Han har vore stipendiat i religionspedagogikk, studentprest, forlagssjef og stiftsdirektør. Han er òg utdanna janitsjardirigent, deltek i fleire ulike kulturarrangement med og utan prestekjole. I mai i fjor deltok han under «allsong i parken» som Leirvik Mannskor arrangerte, går det fram  av pressemeldinga.

Svein Arne Theodorsen er styreleiar ved Moster Amfi- og Kyrkjehistoriske Senter. I august i 2017 deltok han som fungerande biskop i Bjørgvin bispedømme på eit historisk arrangementet på Halsnøy kloster saman med riksantikvar Jørn Holme og biskop i Oslo katolske bispedømme Bernt Eidsvig.

– Det vert som vanleg på møta i senioruniversitetet servert kaffi og noko å bita i etter foredraget. Og vi må ikkje gløyme det sosiale samværet og den gode drøsen etterpå.

Møta i Senioruniversitetet er opne for alle interesserte som har høve til å delta på arrangement midt på dagen. Vel møtt, helsar Kvinnherad Senioruniversitet.