– Meir enn eg drøymde om

Onsdag strøymde folk og fe med givarlyst til Husnes ungdomsskule for å levera klede og leiker til dei syriske flyktningane i Tyrkia. Initiativtakar Abdulhai Korda er overvelda over responsen.

Vi får inn ufattelege mengder med klede frå folk i heile kommunen. Eg er heilt sjokkert over kor fantastiske folka i Kvinnherad er, og dette er så mykje meir enn kva ein kunne drøymd om, seier Abdulhai Korda, mannen som tok initiativ til innsamlinga.

 

Stort prosjekt

Etter at Abdulhai bestemte seg for at han måtte gjera noko for å hjelpa dei syriske flyktningane med opphald i Tyrkia, tok han og ungane hans, Laith og Aila, kontakt med rektor ved Husnes ungdomsskule, Morten Vevatne. Då gjekk ideen frå å vera eit familiært initiativ til å bli det Abdulhai kallar eit kommunalt prosjekt på rekordtid. Skulen har gjort ein fantastisk jobb. Det som byrja som ein personleg idé vart etter ein samtale med Morten på to dagar til dette fantastiske prosjektet der heile kommunen bidrar. Eg er heilt overvelda, seier Korda.

Valfagslinjene, internasjonalt samarbeid og innsats for andre, samt elevrådet hadde ansvar for det som skjedde på skulen. Her hadde elevane, på tvers av klassetrinna, ulike oppgåver. Dei tok i mot, sorterte og pakka ned kleda som på løypande band fylte opp mottaksrommet. Før Aila og sjåføren hennar køyrde kleda til eit lager på Helland, der Abdulhai og Laith vidare sorterte resten. Vevatne er stolt over det skulen i samband med Abdulhai har fått til.

Det er heilt utruleg. Vi har fått inn posar med flett nye kleder og sko frå foreldre, besteforeldre, butikkar og alle andre som ville bidra. Det kjem også elevar med pengegåver dei har med seg heime frå, som dei gjerne vil gi til saka, seier Vevatne.

Dei viser viljen til det å vera eit medmenneske, og dei vil så gjerne bidra. Det gleder eit rektorhjarta, legg Vevatne til.

 

Personleg transport

Fredag set Abdulhai og dottera Aila snuten i retning det syriske flyktningmottaket i Tyrkia, der dei personleg skal overlevera alt det dei har fått inn. Mens far og dotter køyrer dei 4500 kilometrane til Tyrkia, har Laith ansvaret om å samla det som er att i Kvinnherad.

Planen var eigentleg å køyra min personlege bil, men med alt det som no er kome inn var vi nøydde til å låna oss ein større. Laith har mykje han må her heima, men styrer resten av det som kjem inn i Kvinnherad, mens eg og Aila køyrer til Tyrkia for å overlevera alt det dei varme innbyggjarane i kommunen har gitt, seier Abdulhai, som gler seg til å sjå reaksjonane hos menneska.