Tida er inne for DAB+

Allereie 21. juni vil det vera Hordaland, i selskap med Sogn og Fjordane, Rogaland og Agder, sin tur til å miste riksdekkande kanalar. Dette betyr at NRK sløkkjer sine FM-sendingar frå denne datoen.

På landsbasis har overgangen skjedd gradvis, og no er det altså vestlandsfylka sin tur. Trass i at NRK-kanalane forsvinn, vil du framleis kunne høyre dei kommersielle kanalane Radio Norge, P4 og enkelte lokalradiosendingar fram til 15. september. Nokre lokalradioar vil fortsetje å sende på FM også etter 2017.

 

DAB+

Arvtakaren for FM-nettet vil vera DAB+, som igjen er ein vidareutvikling av DAB. Du vil altså trenge DAB+ for å ta inn dei nye sendingane. Det som skil FM og DAB+ er at det i FM-nettet berre var plass til fem riksdekkande kanalar, medan det i DAB-nettet er plass til 25. Det er i tillegg betre lydkvalitet utan skurring, samt at ein i tillegg til lyd også kan sende tekst og enkel grafikk. DAB-radioar med stort display kan dra nytte av denne teknologien. Dette kan til dømes vera kjappe nyhendemeldingar, informasjon om songar som vert spelt, plateomslag med meir.

I følgje Medietilsynet finst det ulike adapter- og antenneløysingar for å få DAB+ i bil, men det er ikkje alle løysingar som passar i alle bilar. Det er difor å tilrå å ta kontakt med ein forhandlar for å finne ut kva som høver for din bil. Er du i eit område med svakare signal, kan det vera naudsynt med ei kraftigare antenne for å sikre godt mottak. Til dømes på hytta eller i andre mindre tett befolka område. Behovet for sterkare antenne kan også potensielt gjelde for båt.

 

Stor etterspurnad

Hjå Dimmelsvik Bil har dei merka at det nærmar stenging av FM-nettet.

– Vi har hatt radioar og adapter i hyllene lenge, men veldig mange har av ein eller anna grunna villa venta med å oppgradera til DAB+, fortel Øystein Handeland, verkstadleiar ved bedrifta.

I det siste har salet auka på, og dei fleste vel å få det montert på verkstaden.

– Den siste veka har det vore stor pågang frå kundar som har høyrt at sløkkinga av nettet er nært føreståande, så vi har montert radio eller adapter til mange i det siste. Eg har ikkje talet på selde og monterte radioar og adapter, men det har vore bra trykk, sluttar ein travel Handeland.