Svært mange trøytte sjåførar

Ei fersk undersøking viser at over halvparten av bilistane i Hordaland har halde på å sovna bak rattet.

 

Desse urovekkande tala kjem fram i ei undersøking som er gjort av Ipsos for Gjensidige. Heile 58 prosent av dei som har svart i Hordaland seier at dei har vore redde for å sovna bak rattet. 7 prosent svarer at dei faktisk har sovna når dei har køyrt bil.

– Det vil seia at fleire tusen bilistar heimehøyrande i Hordaland har duppa av under ein køyretur, seier Arne Voll, kommunikasjonssjef i Gjensidige, i ei pressemelding.

Gjensidige får cirka 60 skademeldingar i året som skuldast at sjåfør sovna bak rattet, men erfaringar viser at det er langt fleire saker. Mange vil nemleg ikkje vedgå at dei sovna, eller er usikre på det.

– Det som er betenkeleg er at mange er viljuge til å fortsetja å køyra når dei er blir trøytte, seier Voll videre.

 

Dobbelt så mange menn

Han trur mange tenker at dei snart er framme og at det går fint, og så tek dei sjansen.

– Då er det viktig å hugsa på at sjølv ei kort strekning eller berre ein liten halvtime kan verka uendeleg lang når ein er trøytt. I aldersgruppa mellom 18 og 29 år svarer heile 21 prosent at dei køyrer vidare, heiter det i pressemeldinga.

Undersøkinga avslører at meir enn dobbelt så mange menn har sovna bak rattet enn kvinner.

– Viss ein fyrst har blitt trøytt er det berre to ting som hjelper, og det er å bytta sjåfør eller stoppa og ta ein høneblund. Alt anna er å lura seg sjølv, avsluttar Arne Voll.

I undersøkinga vart det også spurd om kva bilistane i Hordaland gjer når dei blir for trøytte til å køyra vidare. Svara fordelte seg slik:

* 47 prosent stoppa og tok ein kvilepause.

* 32 prosent aktiviserte seg med musikk, samtale med passasjer eller andre ting.

* Berre 13 prosent overlét køyringa til ein annan i bilen.

* 7 prosent fortsette å køyra til dit dei skulle.