Skave; skjære, skrape, spikke (av) med skarpt reiskap

Møbeldesignar Njål Thunold Hatteberg frå Rosendal deltar denne helga, som del av designtrioen YTRE, i ein handverkskonkurranse og utstilling i Oslo. No kan Hatteberg & Co gle seg over å sjå oppbevaringsboksane «Skave» i framtidig produksjon. Dei vann nemleg heile konkurransen.

Håndverk+ er ei plattform kor handverkarar og designarar møtes for å dela kunnskap. Målet er å løfta tradisjonsrikt handverk, teknikkar og metodar inn i framtida. I år vart H+ arrangert for fjerde gong.

Nytt av året er samarbeidet med interiørmerket Fram Oslo, og i vår inviterte desse aktørane norske handverkarar til konkurranse innan temaet ornamentikk. Det er dei beste bidraga som kom inn til denne, som no er utstilt i Oslo, mellom 7. og 10. oktober.

Produkta som vart vurderte til konkurransen skulle tolke årets tema, ha ein tydeleg nyttefunksjon, ha ein historie, passe inn i samtida sine heimar, skulle kunne bli produsert i Norge, kunne industrialiserast og dei skulle vera originale. Opp til ti produkt skulle veljast ut som finalistar til utstillinga, og vinnaren vart kunngjort torsdag, 7. oktober: oppbevaringsboksane «Skave».

– Eg er imponert over Ytre, som viser ein «svoltenheit» og profesjonalisme i sitt arbeid med Skave. På tross av at dei framleis er studenter, visar dei eit gjennomført prosjekt, boksane er vakre, uttalar juryformann Andreas Engesvik i ei pressemelding.

Element frå vestlandsarkitekturen

– Boksane er teikna saman med to medstudentar ved KMD. Her har vi teke føre oss arkitektoniske element frå vestlandsarkitekturen – bølgjeblikk, murstein og vestlandskledning. Elementa har vi implementert i denne serien oppbevaringsboksar, informerer Hatteberg, som går på masterstudiet på fakultetet for Kunst, musikk og design i Bergen.

Den Bergensbaserte designtrioen YTRE, som forutan Njål Hatteberg består av Taran Neckelmann og Ayla Gürsoy, gjekk altså til topps i konkurransen, og kan såleis gle seg over å sjå produkta bli produsert av interiørmerket Fram Oslo. Dette var nemleg inkludert i premien, som elles inkluderer 10.000 kroner i designstipend, samt moglegheiter for vidare samarbeid.

Skave-serien er YTRE sine første prototypar, og samarbeidet starta såleis svært bra.

Ornamentikk

I konkurranseteksten vart det presisert kva ornamentikk er:

«Eit ornament er eit visuelt formelement som kan stå åleine eller vere ein del av eit samansett mønster. Ein kan sjå det som ein dekorasjon eller utsmykking, og det førestiller ofte ein plante, eit dyr, ein gjenstand, eller grafisk figur som på geometrisk vis er stilisert og plassert i eit symmetrisk mønster.»

Det er dette temaet YTRE har løyst med å hente element frå vestlandsarkitekturen. Elementa har blitt nyttegjort som meiningsfull dekor på oppbevaringsboksane, som i følgje Fram Oslo og H+, er laga for å «ta vare på tinga du elskar». Samstundes som arrangøren annonserte vinnaren, understreka dei at det er ei spanande tid for norsk design.

I juryen si grunngjeving kan ein mellom anna lesa følgjande:

Vinnaren av årets Fram Oslo x Håndverk+ designkonkurranse har klart å foreine ornamentikk og funksjonalitet på ein glimrande måte. Produktet er eit smykke i seg sjølv, samstundes som det har ein tydeleg funksjon. Designet er tradisjonelt, men nytt, og ivaretek både kulturarven og handverket. Vinnaren er nyskapande i si tolkning, kor historiske element har blitt forenkla for å passe inn i samtida.

Taran Neckelmann og Ayla Gursoy fullfører sin mastergrad ved KMD, Institutt for design på Universitet i Bergen våren 2022, og Njål Hatteberg vil bli ferdig med sin mastergrad våren 2023. Vi kan bare gle oss til fortsetjinga.

Vinnarane får eit designstipend frå Fram Oslo på 10 000 og Skave vil bli sett i produksjon.