Stor øving på Sunde – ambulansetenesta fekk testa og demonstert avansert utstyr

Velferdslaget for Kvinnherad ambulanse fekk tildelt midlar av Sparebank 1 Stiftinga Kvinnherad i vår. 340 000 kroner var summen, og pengane gjekk til å fullfinansiere eit varmesøkande kamera til ambulansebåten.

Nokre timar før søknadsfristen på haustutdelinga til Sparebankstiftinga gjekk ut, var det klart for ein demonstrasjon av det nye utstyret.

Ei stor gruppe uniformerte personar stod klare på Sunde ferjekai rundt klokka 09 i morgontimane, tysdag. Her var politi, ambulanse og Kvinnherad Røde Kors Hjelpekorps representert. Midt i gruppa var også ei gruppe sivilt kledde menneske; representantar frå stiftinga som gjorde innkjøpet mogleg.

Ålmennyttig formål

Styret i Sparebank 1 Stiftinga Kvinnherad var representert ved Magnhild Haugland, Svein Arne Eidsvik, Gunnar Våge, Hildegunn Aarthun og leiar Bente Lie Nilsen. Dei var invitert for å vera vitne til korleis det nye utstyret ville koma Kvinnherad og regionen til gode, og dei hadde såleis ein svært interessant dag på jobben.

– Det er godt å ha slike eldsjeler, og det er bra at me får til slike øvingar, kommenterte Magnhild Haugland etter å ha ordna litt på håret som redningshelikopteret hadde ruska til.

Luftforsvaret sitt nye redningshelikopter var nemleg også med på øvinga, og kom fykande som bestilt rundt 09.15.

Bente Lie Nilsen var samd med Haugland.

– Det er veldig fint å vera med på å støtte slike tiltak, og det er kjekt å få sjå korleis det kjem innbyggjarane til gode, smilte ho.

Viktige øvingar

Svein Arne Eidsvik slo av ein kort prat med André Rønbeck, på ambulansedekket, før helikopteret på luftig vis tok sistnemnde med seg til land. I løpet av praten fekk Eidsvik avklart at Redningshelikopteret har om lag ein uttrykking til dagen, og at om lag halvparten av utrykkingane deira er øvingar. Rønbeck jobbar som redningsmann på redningshelikopteret, kor mannskapet tel totalt seks personar.

Tysdagens øving innebar at fire personar, Egil Fallmyr, Eirin Hegland, Ivar Soldal og Espen Soldal, vart lagt til blaut i fjorden utanføre Sunde ferjekai. Der vart dei tydeleg oppdaga av kameraet i ambulansebåten, og dei vart dernest plukka opp av redningshelikopteret.

Egil Fallmyr vart, i motsetnad til dei tre andre, henta om bord til ambulansebåten, der mannskapet fekk øvd på hjarte- og lungeredning. Slik gjennomførte dei livreddande berging, før Fallmyr – blid og levande – vart frakta trygt i land med helikopteret.

Godt samarbeid

Vel i land venta kaker og kaffi, og omvisning i redningshelikopteret for dei som ønska det. Den avrundande seansen gjekk føre seg på Handeland gard sin landingsplass på Opsanger, like ovanfor kaien til ambulansebåten.

Jarle Larsen understreka at naudetatane i kommunen er svært takksame for at dei får nytta plassen, og takka også BKS for deira bidrag. Det er nemleg BKS som har laga stanga som kameraet er montert på, og dette har dei gjort på dugnad.

Samanlagt vitna tysdagens øving om at redninga ikkje berre er nær og god om ein havnar i uføret. Den viste samstundes at det eksisterer eit fungerande samarbeid mellom naudetatane og næringslivet i kommunen, som legg til rette for at kompetansen, utstyret og vilkåra for redning skal kunna vera i framsetet.