Rekordbesøk på klosteret

Truleg har Halsnøy kloster aldri teke i mot fleire gjester enn i år.

 

Dei enorme turistmengdene som har vitja Kvinnherad i sommar, har også kome Halsnøy kloster til gode.

– Besøket i år har vore betre enn nokon sinne, slår sommarguide Miriam Petersen Eide fast.

No i sommar har klosteret hatt ope alle dagar unnateke måndagar. Publikum har kunna få med seg omvisingar, eller sjå den historiske utstillinga i kjellaren. Der står også salsutstillinga med Signe Schineller sin keramikk.

Sunnhordland museum, som Halsnøy kloster er ein del av, har femdobla besøket sitt samanlikna med tidlegare.

– Vi har veldig mange innom her, og det kjem folk heile tida. Mange går tur på eigenhand, men det er òg mange med på omvisingane. Det er nok rekord her òg, vurderer Miriam.

Sommarsesongen er på hell, men ifølgje planane skal to konsertar frå den avlyste Klosterdagen i juni gå av stabelen høvesvis i september og november.