Redningsaksjon i Blådalen

Eit tips frå ein fjellgåar sette i gang ein større aksjon måndag ettermiddag.

Oppdraget bestod i å berga éin sau og eitt lam ut or skorfeste.

Fleire representantar frå Brandvik-kvia i Bjørnebøle beitelag møttest ved Blådalsdammen måndag ettermiddag for å setja i gang redningsaksjonen.

– Dei to sauene hadde stått på ei lita fjellhylle over helga, og kom seg ikkje derifrå på eiga hand. Ikkje var der meir mat å finna heller. Etter ei lengre rådslaging vart det organisert eit sinnrikt system av tauverk, med sikring av folk og nedfiring av fe. Det var ei stund uvisst kven som skulle fira ned kven…, opplyser Magne Vikane Bjelland.

Denne gongen var det eit tips frå Erlend Matre om mogleg sau i skorfeste som førde til at «alarmen gjekk».

– Vi er veldig glade for at folk bryr seg om dyra våre, og tek kontakt dersom dei ser noko gale, seier Anbjørn Høivik.

Turvandrarar som ser noko dei vil varsla om kan ta kontakt med leiar i beitelaget Stein Olav Ølvestveit.